കണ്ണൂര്: ബി.ജെ.പി. നേതാവ് പ്രകാശ് ജാവഡേക്കറും സി.പി.എം. കേന്ദ്രകമ്മിറ്റി അംഗം ഇ.പി. ജയരാജനും കൂടിക്കാഴ്ച നടത്തിയതില് രൂക്ഷമായ വിമർശനവുമായി മുഖ്യമന്ത്രി പിണറായി വിജയന്. ഇ.പി. ജയരാജൻറെ ജാഗ്രതക്കുറവിനെക്കുറിച്ചായിരുന്നു മുഖ്യമന്ത്രിയുടെ പ്രതികരണം. "പാപിയുടെ കൂടെ ശിവന് കൂടിയാല് ശിവനും പാപിയായിടുമെന്നായിരുന്നു" അദ്ദേഹത്തിൻറെ ആരോപണം. വോട്ട് ചെയ്ത ശേഷം മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം.
'ഇന്ന് ആരെ വഞ്ചിക്കണമെന്ന് ആലോചിച്ച് ഉറക്കമുണരുന്നവര് നമ്മുടെ നാട്ടിലുണ്ട്. അത്തരത്തിലുള്ള ആളുകളുമായുള്ള കൂട്ടുകെട്ട് സാധാരണഗതിയില് ഉപേക്ഷിക്കേണ്ടതാണ്. സഖാവ് ജയരാജന് ഇത്തരം കാര്യങ്ങളില് വേണ്ടത്ര ജാഗ്രത കാണിക്കാറില്ല എന്നത് നേരത്തേ തന്നെ ഉള്ള അനുഭവമാണ്. അതിൻറെ ഭാഗമായി കേരളത്തില് ഏറ്റവുമധികം സംശയകരമായ സാഹചര്യത്തില് നില്ക്കുന്ന വ്യക്തിക്ക് ഇതിന്റെ സാക്ഷിയായി വരാന് കഴിഞ്ഞുവെന്നത് നാം കാണേണ്ടതുണ്ട്.' -പിണറായി വിജയന് മാധ്യമങ്ങളോട് പറഞ്ഞു.