കരളിനെ സംരക്ഷിക്കാം ഈ 5 പാനീയങ്ങളിലൂടെ

By Avani Chandra.19 04 2022

imran-azhar

 

കരള്‍ എന്നത് നമ്മുടെ ശരീരത്തിലെ ഏറ്റവും പ്രധാനപ്പെട്ട അവയവങ്ങളില്‍ ഒന്നാണ്. കരളിന്റെ ആരോഗ്യത്തെ അവഗണിച്ചാല്‍ അത് ശരീരത്തെ മൊത്തത്തില്‍ പ്രതിസന്ധിയിലാക്കും. കരള്‍ രോഗം ബാധിച്ച് കഴിഞ്ഞാല്‍ അത് കരളിനെ മാത്രമല്ല ശരീരത്തിന്റെ ഓരോ അവയവങ്ങളെയായി ബാധിക്കാന്‍ തുടങ്ങുന്നു. ജനിതക രോഗങ്ങള്‍, പിത്താശയ സംബന്ധമായ പ്രശ്നങ്ങള്‍, കരള്‍ വീക്കം എന്നിവയെല്ലാം ആരോഗ്യത്തെ ദോഷകരമായി ബാധിക്കുന്നു. അതുകൊണ്ടു തന്നെ കരളിനെ ആരോഗ്യകരമായി നിലനിര്‍ത്തേണ്ടത് അത്യാവശ്യമാണ്. ആരോഗ്യകരമായ ഭക്ഷണത്തിലൂടെയും ചിട്ടയായ ജീവിതചര്യയിലൂടെയും കരളിനെ സംരക്ഷിക്കാം. ചില പാനീയങ്ങള്‍ കരളിന്റെ ആരോഗ്യത്തിന് നല്ലതാണ്. അവയേതെന്ന് നോക്കാം.

 

1. കോഫി

 

ആഗോളതലത്തില്‍ ജനപ്രിയമായിട്ടുള്ള പാനീയമാണ് കോഫി. ഒരു ദിവസം മുഴുവന്‍ ഊര്‍ജ്ജത്തോടെ ഇരിക്കാന്‍ ഒരു കപ്പ് കാപ്പിയിലൂടെ സാധിക്കും. കൂടാതെ, ശരിയായ അളവില്‍ കാപ്പി കഴിക്കുന്നത് കരളിന്റെ ആരോഗ്യം മെച്ചപ്പെടുത്താന്‍ സഹായിക്കുമെന്ന് നിരവധി പഠനങ്ങള്‍ വ്യക്തമാക്കുന്നു. ''കാപ്പിയുടെ മിതമായ ഉപഭോഗം കരളിനെ രോഗവിമുക്തമാക്കാന്‍ സഹായിക്കുമെന്ന് പരീക്ഷണാത്മക പഠനങ്ങള്‍ തെളിയിച്ചിട്ടുണ്ട്. കാപ്പിയുടെ ഉപയോഗം കരളിലെ കൊഴുപ്പ് അടിഞ്ഞുകൂടുന്നത് കുറയ്ക്കുന്നു, അതേസമയം ഗ്ലൂട്ടത്തയോണ്‍ - ശക്തമായ ആന്റി ഓക്സിഡന്റ്-ഉല്‍പാദനം വര്‍ധിപ്പിക്കുന്നതിലൂടെ ആന്റി ഓക്സിഡന്റ് ശേഷി കൂട്ടുന്നു'' ന്യൂട്രിഷനിസ്റ്റ് രൂപാലി ദത്ത പറയുന്നു.

 

2.ഗ്രീന്‍ ടീ

 

ഗ്രീന്‍ ടീയും വ്യായാമവും കരളിന്റെ ആരോഗ്യം മെച്ചപ്പെടുത്താന്‍ സഹായിക്കുമെന്ന് ജേണല്‍ ഓഫ് ന്യൂട്രീഷണല്‍ ബയോകെമിസ്ട്രിയില്‍ പ്രസിദ്ധീകരിച്ച പഠനത്തില്‍ വ്യക്തമാക്കുന്നുണ്ട്. ഗ്രീന്‍ ടീ ഫാറ്റി ലിവര്‍ രോഗം പിടിപെടാനുള്ള സാധ്യത 75 ശതമാനം കുറയ്ക്കുമെന്നും പഠനത്തില്‍ പറയുന്നു. ശരീരഭാരം കുറയ്ക്കാന്‍ മാത്രമല്ല പ്രതിരോധശേഷി വര്‍ദ്ധിപ്പിക്കാനും സഹായിക്കുന്നു. ഒരു നുള്ള് മഞ്ഞള്‍ പൊടി ചേര്‍ത്ത് വേണം ഗ്രീന്‍ ടീ കുടിക്കേണ്ടത്. കാരണം, രക്തചംക്രമണം മെച്ചപ്പെടുത്തുന്നതിനും മഞ്ഞള്‍ സഹായിക്കുന്നു.

 

3.മഞ്ഞള്‍ ചായ

 

നിരവധി ആരോഗ്യഗുണങ്ങളുള്ള മഞ്ഞള്‍ കരളിനും നല്ലതാണ്. എന്‍സൈമുകളുടെ ഉത്പാദനം വര്‍ദ്ധിപ്പിച്ച് ഡിറ്റോക്‌സ് പ്രക്രിയയെ പിന്തുണയ്ക്കുന്ന ആന്റി ഓക്സിഡന്റുകള്‍ മഞ്ഞളില്‍ അടങ്ങിയിട്ടുണ്ട്. ശരീരത്തിലെ രക്തചംക്രമണം പ്രോത്സാഹിപ്പിക്കുന്നതിനും കരളിന്റെ ആരോഗ്യം മെച്ചപ്പെടുത്തുന്നതിനും മഞ്ഞള്‍ സഹായിക്കുന്നു. ദിവസവും മഞ്ഞള്‍ച്ചായ ശീലമാക്കിയാല്‍ അത് കരളിനും ഗുണം ചെയ്യും.

 

4.നെല്ലിക്ക ജ്യൂസ്

 

ആന്റി ഓക്സിഡന്റുകള്‍, ആന്റി-ഇന്‍ഫ്‌ലമേറ്ററി ഗുണങ്ങള്‍, വിറ്റാമിന്‍ സി തുടങ്ങി നിരവധി അവശ്യ പോഷകങ്ങളാല്‍ സമ്പന്നമാണ് നെല്ലിക്ക. ഈ ഘടകങ്ങള്‍ വിഷവസ്തുക്കളെ പുറന്തള്ളാനും കരളിന്റെ ആരോഗ്യത്തെ സംരക്ഷിക്കാനും സഹായിക്കുന്നു. രോഗപ്രതിരോധശേഷി കൂട്ടാനും നെല്ലിക്ക നല്ലതാണ്.

 

5.ബീറ്റ്‌റൂട്ട് ജ്യൂസ്

 

നമ്മുടെ പോഷക സമ്പുഷ്ടമായ ഭക്ഷണക്രമത്തില്‍ ഉള്‍പ്പെടുത്താനുള്ള ആരോഗ്യകരമായ പച്ചക്കറിയാണ് ബീറ്റ്‌റൂട്ട്.ഇതില്‍ ആന്റിഓക്സിഡന്റുകളും ഫോളേറ്റ്, പെക്റ്റിന്‍, ബെറ്റാലൈന്‍, ബീറ്റൈന്‍ തുടങ്ങിയ പോഷകങ്ങളും അടങ്ങിയിട്ടുണ്ട്.കൂടാതെ, ഇത് ആവശ്യമായ അളവില്‍ നാരുകള്‍, മാംഗനീസ്, പൊട്ടാസ്യം, വിറ്റാമിന്‍ എ, വിറ്റാമിന്‍ സി എന്നിവ നല്‍കുന്നു. ഈ പോഷകങ്ങള്‍ പിത്തരസത്തിന്റെ ഒഴുക്ക് മെച്ചപ്പെടുത്താന്‍ സഹായിക്കുന്നു, ഇത് നമ്മുടെ ശരീരത്തില്‍ നിന്ന് വിഷ മാലിന്യങ്ങള്‍ നീക്കം ചെയ്യാന്‍ സഹായിക്കുന്നു.

 

നിങ്ങളുടെ ദൈനംദിന ഭക്ഷണത്തില്‍ ഈ പാനീയങ്ങള്‍ ഉള്‍പ്പെടുത്തുകയും ആരോഗ്യകരമായ ജീവിതം ആസ്വദിക്കുകയും ചെയ്യുക. ഏതെങ്കിലും തരത്തിലുള്ള ജീവിതശൈലി മാറ്റത്തിലേക്ക് മാറുന്നതിനു മുമ്പ് ഡോക്ടറുമായി ബന്ധപ്പെടുക.

 

OTHER SECTIONS