കൂടുതല്‍ നേരം ഇരുന്ന് ജോലി ചെയ്താല്‍

By parvathyanoop.20 09 2022

imran-azhar

 

 

തുടര്‍ച്ചയായി ഇരുന്ന് ജോലി ചെയ്യുന്നത് മൂലം ചില പേശികള്‍ അമിതമായി ഉപയോഗിക്കുകയും മറ്റുചിലതിനെ തീരെ ഉപയോഗിക്കാതിരിക്കുകയുമാണ് ചെയ്യുന്നത്. ഇത് മലബന്ധം, സമ്മര്‍ദ്ദം, തളര്‍ച്ച തുടങ്ങിയവയ്ക്ക് കാരണമാകും. മെറ്റബോളിസവും രക്തപ്രവാഹവും മന്ദഗതിയിലാക്കും എന്നുമാത്രമല്ല രക്തത്തിലെ പഞ്ചസാര, രക്തസമ്മര്‍ദ്ദം എന്നിവ നിയന്ത്രിക്കാന്‍ ശരീരത്തിന് കഴിയാതെയാകും.

 

ഹൃദ്രോഗം, ചിലതരം കാന്‍സര്‍, ടൈപ്പ് 2 പ്രമേഹം, രക്തം കട്ടപിടിക്കുന്നത് പോലെയുള്ള വാസ്‌കുലാര്‍ പ്രശ്നങ്ങള്‍, മോശം രക്തചംക്രമണം, പുറം വേദന, പേശി വേദന, മന്ദഗതിയിലുള്ള മെറ്റബോളിസം തുടങ്ങി പല പ്രശ്നങ്ങളാണ് ദീര്‍ഘനേരമുള്ള ഇരിപ്പ് വഴി ഉണ്ടാകുന്നത്.

 

ജോലിയുമായി ബന്ധപ്പെട്ട് ദീര്‍ഘനേരം ഇരിക്കേണ്ടിവരുമ്പോള്‍ കുറച്ചുസമയമെങ്കിലും എഴുന്നേറ്റു നിന്ന് ജോലിചെയ്യാന്‍ ശ്രമിക്കാം. ടിവി കണ്ടിരിക്കുന്നതിന് പകരം നടത്തമാകാം. എവിടെയാണ് കൂടുതല്‍ സമയം ഇരിക്കുന്നത് എന്ന് കണ്ടെത്തി മറ്റേതെങ്കിലും മാര്‍ഗ്ഗത്തിലൂടെ ആ സമയം കുറയ്ക്കാന്‍ പരിശ്രമിക്കണം.

 

ഇരിക്കുമ്പോള്‍ കാലുകള്‍ തറയില്‍ മുട്ടിച്ച് മുട്ട് 90ഡിഗ്രി മടക്കിവേണം ഇരിക്കാന്‍. കഴുത്ത് നേരെ വെക്കണം. ഇതിനായി കമ്പൂട്ടര്‍ മോണിറ്ററിന്റെ പൊസിഷന്‍ ക്രമീകരിക്കണം. കഴിത്ത് റിലാക്‌സ് ചെയ്തിടണം. ഇതിനായി ആംറെസ്റ്റ് ഉള്ള കസേര ഉപയോഗിക്കാം. ടൈപ്പ് ചെയ്യുമ്പോള്‍ കൈമുട്ടുകള്‍ 90ഡിഗ്രി ആംഗിളില്‍ ആയിരിക്കണം. കൈത്തണ്ടയ്ക്കും ടേബിളിലോ മറ്റോ റെസ്റ്റ് നല്‍കണം.

 


ദീര്‍ഘനേരം ഇരിക്കാതെ ഇടവേള എടുക്കാന്‍ ശ്രമിക്കണം. എല്ലാ അരമണിക്കൂര്‍ കൂടുമ്പോഴും ഒന്ന് എഴുന്നേറ്റ് ശരീരം ഒരു മൂന്ന് മിനിറ്റെങ്കുലും അനക്കണം. ഒരു 15 അടി നടന്നാല്‍ പോലും അത് പ്രയോജനം ചെയ്യും. ഫോണ്‍ വിളിക്കുമ്പോഴും മറ്റും നടന്ന് സംസാരിക്കുന്നത് ശീലമാക്കിയാല്‍ നല്ലതാണ്. വെള്ളം നിറച്ചുവയ്ക്കാന്‍ ചെറിയ കുപ്പി ഉപയോഗിക്കാം, ഇത് ഇടയ്ക്കിടെ നിറയ്ക്കാനായി നടക്കുന്നത് നല്ലതാണ്.

 

എലിവേറ്ററും ലിഫ്റ്റും ഉപയോഗിക്കുന്നതിന് പകരം കയറാനും ഇറങ്ങാനും പടികളാണ് നല്ലത്. ട്രെയിനിലും ബസിലും യാത്രചെയ്യുമ്പോള്‍ സീറ്റ് കണ്ടാലുടന്‍ ചാടിയിരിക്കാതെ നിന്നുകൊണ്ട് യാത്രചെയ്യാന്‍ ശ്രമിക്കാം. ആഴ്ചയിലൊരിക്കലെങ്കിലും അരമണിക്കൂര്‍ നടത്തം പതിവാക്കണം. ദിവസവും വ്യായാമം ചെയ്യുന്നത് ആരോഗ്യപ്രശനങ്ങളെ ഒരുപരിധി വരെ നിയന്ത്രിക്കാന്‍ സഹായിക്കും.

 

 

OTHER SECTIONS