പാവം കൊളസ്‌ട്രോളിനെ വില്ലനാക്കരുത്

By Rajesh Kumar.09 Nov, 2017

imran-azhar

ശരീരഭാരത്തിന്റെ ഏകദേശം പകുതിയോളം വരുന്ന കൊളസ്‌ട്രോള്‍ ശരീരത്തിന്റെ ഊര്‍ജ്ജാവശ്യങ്ങള്‍ നിറവേറ്റുന്നു. രക്തത്തില്‍ ലയിച്ചു ചേരാത്ത കൊളസ്‌ട്രോള്‍ പ്രോട്ടീനുമായി കൂടിച്ചേര്‍ന്ന് ലിപോപ്രോട്ടീന്‍ കണികയായി രക്തത്തിലൂടെ ശരീരത്തിന്റെ എല്ലാ ഭാഗത്തും എത്തിച്ചേരുന്നു. 

നിശ്ചിത അളവില്‍ കൊളസ്‌ട്രോള്‍ ആരോഗ്യമുള്ള ശരീരത്തിന് ആവശ്യമാണ്. ശരീരത്തിലെ കോശഭിത്തികളുടെ നിര്‍മ്മിതിക്കും കോശങ്ങളുടെ വളര്‍ച്ചയ്ക്കും കൊളസ്‌ട്രോള്‍ ഒരു മുഖ്യ ഘടകമാണ്. അതുപോലെ തന്നെ സെക്‌സ് ഹോര്‍മോണുകളായ ആന്‍ഡ്രജന്‍, ഈസ്ട്രജന്‍ എന്നിവയുടെ ഉല്പാദനത്തിനും എ, ഡി, ഇ, കെ വൈറ്റമിനുകളെ പ്രയോജനപ്പെടുത്താനും സൂര്യപ്രകാശത്തെ വൈറ്റമിന്‍ ഡിയാക്കി മാറ്റാനും കൊളസ്‌ട്രോള്‍ സഹായിക്കുന്നു. വൃക്കകളിലെ കോര്‍ട്ടിസോള്‍ ഹോര്‍മോണുകളുടെ ഉല്പാദനത്തിനും കൊളസ്‌ട്രോള്‍ ആവശ്യമാണ്.
ശരീരത്തിന് ആവശ്യമായ ആകെ കൊളസ്‌ട്രോളിന്റെ 80 ശതമാനവും കരളാണ് ഉല്പാദിപ്പിക്കുന്നത്. ബാക്കി 20 ശതമാനം മാത്രമേ ആഹാരത്തില്‍ നിന്നും ശരീരത്തിനു ലഭിക്കേണ്ടതുള്ളൂ.

 

നല്ലതും ചീത്തയും
ലോ ഡെന്‍സിറ്റി ലിപോപ്രോട്ടീന്‍ ( എല്‍.ഡി.എല്‍ ) അഥവാ ചീത്ത കൊളസ്‌ട്രോള്‍ എന്ന അപരനാമത്തില്‍ അറിയപ്പെടുന്ന കൊളസ്‌ട്രോള്‍ ഘടകത്തിന്റെ അളവ് രക്തത്തില്‍ കൂടിയാല്‍, രക്തധമനികളില്‍ അടിഞ്ഞുകൂടി അപകടകരമായ ആരോഗ്യപ്രശ്‌നങ്ങള്‍ക്കു കാരണമായേക്കാം.
ഹൈ ഡെന്‍സിറ്റി ലിപോപ്രോട്ടീന്‍ ( എച്ച്.ഡി.എല്‍) അഥവാ നല്ല കൊളസ്‌ട്രോള്‍, രക്തധമനികളില്‍ കൊഴുപ്പ് അടിഞ്ഞുകൂടാതെ അതിനെ കരളിലെത്തിക്കാന്‍ പരമാവധി ശ്രമിക്കുന്നു.
വെരി ലോ ഡെന്‍സിറ്റി ലിപോപ്രോട്ടീന്‍ ഏറ്റവും കൂടുതല്‍ ട്രൈഗ്‌ളിസറൈഡുകള്‍ കാണപ്പെടുന്ന കൊഴുപ്പ് കണികയാണ്. ഇത് സാന്ദ്രത വളരെ കുറഞ്ഞ കൊളസ്‌ട്രോളിനെ രക്തത്തിലൂടെ സഞ്ചരിക്കാന്‍ സഹായിക്കുന്നു.
റ്റി.ജി അഥവാ ട്രൈഗ്‌ളിസറൈഡുകള്‍ സാധാരണ കൊഴുപ്പാണ്. ഇവ ഊര്‍ജ്ജം സൂക്ഷിച്ചുവച്ച് ആവശ്യമുള്ളപ്പോള്‍ ശരീരത്തിന് അധിക ഊര്‍ജ്ജം നല്‍കുന്നു. എല്‍.ഡി.എല്‍ രക്തധമനികളില്‍ അടിഞ്ഞുകൂടാന്‍ ഇവ കാരണമാകുന്നു.

 

കൊളസ്‌ട്രോളിന്റെ അളവ്
എല്‍.ഡി.എല്‍, എച്ച്.ഡി.എല്‍, വി.എല്‍.ഡി.എല്‍ എന്നീ മൂന്ന് കൊളസ്‌ട്രോള്‍ ഘടകങ്ങളും കൂടിച്ചേരുന്നതാണ് ടോട്ടല്‍ കൊളസ്‌ട്രോള്‍. ഇത് രക്തപരിശോധനയില്‍ 200 mg/dl താഴെ യായിരിക്കുന്നതാണ് ഉത്തമം.
എല്‍.ഡി.എല്‍: ഹൃദ്രോഗങ്ങളുടെ പ്രധാന കാരണക്കാരനായ എല്‍.ഡി.എല്ലിന്റെ അളവ് 100 mg/dl കുറവായിരിക്കുന്നതാണ് സുരക്ഷിതം.

എച്ച്.ഡി.എല്‍: എച്ച്.ഡി.എല്‍ കൂടുന്നതാണ് നല്ലത്. ഇത് 40 mg/dl കുറയുന്നത് എല്‍.ഡി.എല്‍ കൂടുതല്‍ അടിയാന്‍ കാരണമാകും.

വി.എല്‍.ഡി.എല്‍: വി.എല്‍.ഡി.എല്‍ അളവ് കൂടുന്നതും കൊളസ്‌ട്രോള്‍ ദോഷം കൂട്ടും. 30 mg/dl കൂടാതിരിക്കുന്നതാണ് സുരക്ഷിതം.

റ്റി.ജി: റ്റി.ജി അഥവാ ട്രൈഗ്‌ളിസറൈഡുകള്‍ രക്തധമനികളില്‍ കൊഴുപ്പ് അടിയാന്‍ കാരണമാകുമെന്നതിനാല്‍ അതിന്റെ അളവ് 150 mg/dl താഴ്ന്നു നില്‍ക്കുന്നതാണ് നല്ലത്.

 

പരിശോധനകള്‍
രണ്ടുവിധത്തിലുള്ള പരിശോധനകളാണ് പൊതുവെ കൊളസ്‌ട്രോള്‍ നിര്‍ണ്ണയത്തിനുള്ളത്.

* രക്തത്തിലെ ടോട്ടല്‍ കൊളസ്‌ടോള്‍ അളവ് നിര്‍ണ്ണയം

* ലിപിഡ് പ്രൊഫൈല്‍ പരിശോധന

നല്ല കൊളസ്‌ട്രോളായ എച്ച്.ഡി.എല്ലിന്റെ അളവ് വളരെ കുറഞ്ഞും ചീത്ത കൊളസ്‌ട്രോളായ എല്‍.ഡി.എല്ലിന്റെ അളവ് കൂടിയുമിരിക്കുന്ന അപകടാവസ്ഥയിലും ടോട്ടല്‍ കൊളസ്‌ട്രോള്‍ സുരക്ഷിത നിലയിലായിരിക്കും. വേര്‍തിരിച്ചുള്ള കൃത്യമായ അളവ് ലിപിഡ് പ്രൊഫൈലില്‍ നിന്നും കൃത്യമായി അറിയാം. അതിനാല്‍, ലിപിഡ് പ്രൊഫൈല്‍ പരിശോധനയാണ് കൂടുതല്‍ അഭികാമ്യം.

 

പരിശോധന ശ്രദ്ധിക്കേണ്ടത്
* കൊളസ്‌ട്രോള്‍ നില ശരിയായി മനസ്‌സിലാക്കുന്നതിനായി 9-12 മണിക്കൂര്‍ ഉപവാസം വേണമെന്നാണ് നിലവിലുള്ള നിര്‍ദ്ദേശം. രാത്രി ഭക്ഷണം കഴിഞ്ഞ് ഉറങ്ങാന്‍ കിടന്നാല്‍ രാവിലെ പ്രഭാത ഭക്ഷണത്തിനു മുമ്പ് രക്തം പരിശോധിക്കുന്നതാണ് പ്രായോഗികം. എന്നാല്‍, വെളളം കുടിക്കുന്നതില്‍ കുഴപ്പമില്ല.

* പ്രമേഹരോഗികള്‍, ഹൃദ്രോഗികള്‍, പക്ഷാഘാതം വന്നവര്‍, പുകവലിക്കുന്നവര്‍, ഉയര്‍ന്ന രക്തസമ്മര്‍ദ്ദമുള്ളവര്‍, പാരമ്പര്യമായി ഹൃദയാഘാത സാധ്യതയുള്ളവര്‍ തുടങ്ങിയവര്‍ക്ക് കൊളസ്‌ട്രോള്‍ പരിശോധന അനിവാര്യമാണ്.

* 20 വയസ്‌സാകുമ്പോള്‍ ലിപിഡ് പ്രൊഫൈല്‍ ടെസ്റ്റ് ചെയ്ത് തുടങ്ങണം. ഫലം നോര്‍മല്‍ അഞ്ചുവര്‍ഷത്തിലൊരിക്കല്‍ ടെസ്റ്റ് ചെയ്താല്‍ മതി. അല്ലെങ്കില്‍ ഡോക്ടറുടെ നിര്‍ദ്ദേശപ്രകാരം ചുരുങ്ങിയത് വര്‍ഷത്തിലൊരിക്കല്‍ പരിശോധന നടത്തണം.

* പരിശോധനയ്ക്കു മുമ്പ് വ്യായാമം പാടില്ല. കാരണം വ്യായാമം കൊഴുപ്പ് ഊര്‍ജ്ജമായി മാറുന്നതിന്റെ അളവ് വര്‍ദ്ധിക്കും.

 

കൊളസ്‌ട്രോളും രോഗങ്ങളും
ഹൃദയം: ധമനികളില്‍ കൊളസ്‌ട്രോള്‍ അടിഞ്ഞ് ഹൃദയത്തിലേക്ക് രക്തയോട്ടം കുറഞ്ഞാല്‍ ഹൃദയപേശികള്‍ നിര്‍ജ്ജീവമായി ഹൃദയാഘാതം വരാം.

സ്‌ട്രോക്ക്: തലച്ചോറിലേക്കുള്ള രക്തക്കുഴലുകളില്‍ തടസ്‌സം വന്നാല്‍ സ്‌ട്രോക്ക് ഉണ്ടാകാം.

ഉയര്‍ന്ന ബി.പി: കൊഴുപ്പ് അടിഞ്ഞുകൂടി ധമനികള്‍ ഇടുങ്ങിയാല്‍ ഹൃദയത്തിന്റെ ജോലിഭാരം കൂടി ബി.പി വളരെ കൂടുന്നു.

വൃക്ക: വൃക്കകളിലെ ധമനികളില്‍ കൊഴുപ്പ് അടിഞ്ഞുകൂടി വൃക്കകള്‍ പൂര്‍ണ്ണമായും പ്രവര്‍ത്തനരഹിതമാകാം.

കാലുകള്‍: കാലുകളിലെ രക്തക്കുഴലുകളുടെ വ്യാസം കുറഞ്ഞ് രക്തയോട്ടം കുറയുന്നതു മൂലം രോഗങ്ങളുണ്ടാവാം.

ലൈംഗികശേഷിക്കുറവ്: ഉദ്ധാരണശേഷിക്കുറവ് പോലെയുള്ള രോഗങ്ങള്‍ക്കുള്ള സാധ്യത

 

 

 

 


.

 

loading...

OTHER SECTIONS