സന്തോഷമുള്ള രാജ്യങ്ങളില്‍ ഇന്ത്യയില്ല; ഇതാണ് കാരണം

ജീവിതത്തില്‍ സന്തോഷം ആഗ്രഹിക്കാത്തവരായി ആരുമില്ല.ഓരോരുത്തരും ചെയ്യുന്ന എല്ലാ പ്രവർത്തനങ്ങളും അവരുടെ സന്തോഷത്തിനു വേണ്ടിയാണ്. എന്നാല്‍ ലോകത്തെ ഏറ്റവും സന്തോഷമുള്ള രാജ്യങ്ങളുടെ പട്ടികയിൽ ഇന്ത്യയുടെ സ്ഥാനം ആർക്കും അത്ര സന്തോഷം തരുന്നതല്ല.

2023ലെ വേൾഡ് ഹാപ്പിനസ് റിപ്പോർട്ടിൽ, മുന്‍ വര്‍ഷങ്ങളിലെ പോലെ ഫിന്‍ലാന്‍ഡ് തന്നെയാണ് ഒന്നാമത്.എന്നാൽ 146 രാജ്യങ്ങളുടെ പട്ടികയില്‍ 126 ആണ് ഇന്ത്യയുടെ സ്ഥാനം. അയല്‍രാജ്യങ്ങളായ നേപ്പാൾ, ബംഗ്ലാദേശ്, ചൈന എന്നിവയേക്കാള്‍ താഴെയാണ് ഇന്ത്യയുടെ സ്ഥാനം. കോവിഡ് മഹാമാരിക്കു ശേഷം ഇന്ത്യക്കാരില്‍ മാനസിക സംഘര്‍ഷങ്ങള്‍ വര്‍ധിച്ചു എന്നാണ് റിപ്പോര്‍ട്ട് പറയുന്നത്.

ഐക്യരാഷ്ട്രസഭയുടെ ആഗോള സംരംഭമായ സസ്റ്റെയിനബിള്‍ ഡവലപ്മെന്‍റ് സൊല്യൂഷൻസ് നെറ്റ്‌വർക്കാണ് എല്ലാ വര്‍ഷവും ഈ പട്ടിക പ്രസിദ്ധീകരിക്കാറുള്ളത്. ഗാലപ്പ് ഇൻക് എന്ന കമ്പനി ആഗോള സർവേ നടത്തിയാണ് റാങ്കിടാറുള്ളത്. ജീവിതത്തെ ഒരു ഗോവണിയായി കരുതി 0 മുതല്‍ 10 വരെയുള്ള പടവുകളില്‍ എവിടെയാണ് സ്വന്തം ജീവിതമെന്ന് മാര്‍ക്ക് ചെയ്യാന്‍ വ്യക്തികളോട് ആവശ്യപ്പെടുന്നു.

തൊഴിലില്ലായ്മയും അസമത്വവും പോലെയുള്ള ചില ഘടകങ്ങള്‍ താരതമ്യം സാധ്യമല്ലാത്തതിനാല്‍ സർവ്വെ പട്ടികയില്‍ നിന്ന് ഒഴിവാക്കിയിട്ടുണ്ട്. സാമ്പത്തിക ശാസ്ത്രം, മനഃശാസ്ത്രം, സർവേ വിശകലനം, ദേശീയ സ്റ്റാറ്റിസ്റ്റിക്സ് തുടങ്ങിയ മേഖലകളിലെ വിദഗ്ധരാണ് സര്‍വേയിലൂടെ ലഭിക്കുന്ന വിവരങ്ങള്‍ വിശകലനം ചെയ്ത് പട്ടിക തയ്യാറാക്കുന്നത്.

ലോകത്തിലെ ഏറ്റവും സന്തോഷമുള്ള രാജ്യങ്ങൾക്ക് ആരോഗ്യ സംരക്ഷണം, വിദ്യാഭ്യാസ മേഖല, തൊഴിലില്ലായ്മ ആനുകൂല്യങ്ങൾ എന്നിങ്ങനെ ശക്തമായ സോഷ്യല്‍ സപ്പോര്‍ട്ട് സംവിധാനമുണ്ട്.അതിനാൽ ഈ രാജ്യത്തെ പൗരന്മാർക്ക് ജീവിതത്തിലുണ്ടാക്കുന്ന വെല്ലുവിളികളെ ആത്മവിശ്വാസത്തോടെ നേരിടാൻ സാധിക്കും.മാത്രമല്ല പൗരന്മാർ അനുഭവിക്കുന്ന സ്വാതന്ത്ര്യവും സര്‍ക്കാരിലും സഹജീവികളിലുമുള്ള വിശ്വാസവും വ്യക്തികള്‍ക്ക് സുരക്ഷിതത്വവും ക്ഷേമവും ഉറപ്പുവരുത്തുന്നു.

സന്തോഷമുള്ള രാജ്യങ്ങളിൽ ഭൂരിഭാഗവും തൊഴിൽ - ജീവിത സന്തുലിതാവസ്ഥയ്ക്ക് മുൻഗണന നൽകുന്നുണ്ട്. ദൈര്‍ഘ്യമില്ലാത്ത ജോലി സമയം, ദൈർഘ്യമേറിയ ശമ്പളത്തോടെയുള്ള അവധികൾ, കുടുംബ സൗഹൃദ നയങ്ങൾ എന്നിവയെല്ലാം ഇക്കൂട്ടത്തിൽ ഉള്‍പ്പെടുന്നു. മനോഹരമായ പ്രകൃതിയും പ്രകൃതി ദൃശ്യങ്ങളും അത്തരം അന്തരീക്ഷത്തില്‍ സമയം ചെലവഴിക്കുന്നതും പൗരന്മാർക്ക് സന്തോഷം നല്‍കുന്നു.

പട്ടികയിൽ കോംഗോ, സിംബാബ്‌വെ, സീറ ലിയോൺ, ലെബനൻ, അഫ്ഗാനിസ്ഥാൻ തുടങ്ങിയ രാജ്യങ്ങളാണ് ഏറ്റവും പിന്നില്‍. ദീർഘകാലമായി തുടരുന്ന സംഘർഷങ്ങൾ, ആഭ്യന്തര യുദ്ധങ്ങൾ, രാഷ്ട്രീയ അസ്ഥിരത എന്നിവ നിലനിൽക്കുന്ന രാജ്യങ്ങളാണ് ഇവ.

സംഘർഷങ്ങളും യുദ്ധങ്ങളുമൊക്കെ ജനങ്ങളില്‍ ഭയം, അരക്ഷിതാവസ്ഥ, അനിശ്ചിതത്വം എന്നിവയുണ്ടാക്കുന്നു. സാമ്പത്തിക ബുദ്ധിമുട്ടുകളും ഈ രാജ്യങ്ങള്‍ നേരിടുന്നുണ്ട്. വിദ്യാഭ്യാസം, ആരോഗ്യം തുടങ്ങിയ മേഖലകളിലെ പരിമിതികളും വ്യക്തികളുടെ സന്തോഷത്തെ ബാധിക്കുന്നുവെന്ന് ഹാപ്പിനെസ് റിപ്പോര്‍ട്ട് പറയുന്നു.

ലോകത്തിലെ ഏറ്റവും സന്തോഷമുള്ള 20 രാജ്യങ്ങൾ

1 ഫിൻലാൻഡ്- 7.804 (ഹാപ്പിനെസ് സ്കോര്‍)

2 ഡെന്മാർക്ക്- 7.586

3 ഐസ്ലാൻഡ്- 7.530

4 ഇസ്രയേൽ- 7.473

5 നെതർലാൻഡ്സ്- 7.403

6 സ്വീഡൻ- 7.395

7 നോർവേ- 7.315

8 സ്വിറ്റ്സർലൻഡ്- 7.240

9 ലക്സംബർഗ്- 7.228

10 ന്യൂസിലാൻഡ്- 7.123

11 ഓസ്ട്രിയ- 7.097

12 ഓസ്ട്രേലിയ- 7.095

13 കാനഡ- 6.961

14 അയർലൻഡ്- 6.911

15 യുണൈറ്റഡ് സ്റ്റേറ്റ്സ്- 6.894

16 ജർമ്മനി- 6.892

17 ബെൽജിയം- 6.859

18 ചെക്കിയ- 6.845

19 യുകെ- 6.796

20 ലിത്വാനിയ- 6.763