കേൾക്കുവാൻ കൊതിക്കാറുണ്ടിടക്കൊക്കെ,
സമത്വ നൂൽ നൂറ്റൊരാ ചർക്കതൻ ലോല സംഗീതം.
ഇനിയുമൊരു വസ്ത്രം തുന്നണം ആ നൂലിനാൽ ,
ഭാരത ഭൂവിനായ് ശാന്തിതൻ ശുഭ്രവസ്ത്രം.
കാണണം ഇടക്കൊക്കെ കാഴ്ചകൾ കാലം-
മറിച്ചിടാത്തൊരാ പഴമതൻ കണ്ണടകളിലൂടെ ,
കാണരുതാത്തതൊന്നും കാട്ടിടാത്ത
നന്മതൻ ചില്ലു തീർത്ത കണ്ണട .
സ്വാതന്ത്ര്യ സ്വപ്നങ്ങളിലേക്കൂന്നി നടന്നൊരു-
വടിയും തിരികെ കയ്യിലേന്തണം,
പരതന്ത്ര്യ വിലങ്ങിൽ നിന്നതിജീവന പാത തേടുവാൻ ,
വീണ്ടുമാ സഹനത്തിൻ ഊന്നുവടി .
പാഴാക്കുവാനിട നൽകിടാതെ മാത്രകൾ
എണ്ണിയോരോന്നായ് ചൊന്ന ചെറുഘടികാരം ,
പറയണമിനിയും ജനതയോട്
പാഴാക്കുമോരോ മാത്രയും അമൂല്യം .
ഒടുവിലീ ചിന്തകൾ വിളക്കിയെടുത്തൊരു-
ഗാന്ധിയായി ,
വൈഷ്ണവ ജനതോ മന്ത്രത്താൽ
സമത്വ ഭൂമിക പണിയണം .
ശ്യാം മോഹൻ. എം
നിങ്ങളുടെ രചനകൾ പ്രസിദ്ധീകരിക്കാൻ ആഗ്രഹിക്കുന്നുവെങ്കിൽ രചനകൾ പേരും വിലാസവും ഉൾപ്പെടെ kalakaumudi@gmail.com എന്ന മെയിൽ ഐഡിയിലേക്ക് അയച്ചു തരിക....