കോടമ്പാക്കം മാറ്റി തീർത്ത ഒരു ജീവിതം. അവർ സ്മിതയല്ല... ആ രാത്രിയിൽ സംഭവിച്ചത്?

By Sooraj Surendran.24 09 2019

imran-azhar

 

 

ഒരു കാലഘട്ടത്തിൽ തെന്നിന്ത്യൻ സിനിമ ലോകം അടക്കിവാണിരുന്ന താരസുന്ദരിയായിരുന്നു വിജയലക്ഷ്മി എന്ന സിൽക്ക് സ്മിത. മലയാളം, തമിഴ്, തെലുങ്ക്, കന്നഡ, ഹിന്ദി തുടങ്ങി വിവിധ ഭാഷകളിലായി ഇരുന്നൂറോളം ചിത്രങ്ങളിൽ അവർ അഭിനയിച്ചിട്ടുണ്ട്. ഇന്ന് ബോളിവുഡ് താരം സണ്ണി ലിയോണിനെ നാം എങ്ങനെ ആരാധിക്കുന്നുവോ അതുപോലെയാണ് ഒരുകാലത്ത് സിൽക്ക് സ്മിതയെ ആരാധിച്ചിരുന്നത്. ഇവർ കടിച്ച ആപ്പിൾ വരെ ലേലം ചെയ്തിട്ടുണ്ട്. ഇതിൽ നിന്ന് നമുക്ക് മനസിലാക്കാം സിൽക്ക് സ്മിതയോടുള്ള ആളുകളുടെ ആരാധന. മുപ്പത്തിയാറാം വയസിൽ ചെന്നൈയിലെ വീട്ടിൽ വെച്ചായിരുന്നു സ്മിത ആത്മഹത്യ ചെയ്തത്. സിനിമാലോകം ഞെട്ടലോടെയാണ് ഈ വാർത്ത കേട്ടത്. സില്‍ക്ക് സ്മിത മരിച്ചിട്ട് 23 വര്‍ഷങ്ങള്‍ പൂര്‍ത്തിയായിരിക്കുകയാണിന്ന്. സ്മിതയുടെ ചരമ വാര്‍ഷികത്തിൽ തിരക്കഥാകൃത്തും സംവിധായകനുമായ കലവൂര്‍ രവി കുമാര്‍ ഫേസ്ബുക്കിലൂടെ പുറത്ത് വിട്ട കുറിപ്പ് വൈറലാവുകയാണ്.


കലവൂര്‍ രവി കുമാറിന്റെ ഫേസ്ബുക്ക് കുറിപ്പിന്റെ പൂർണരൂപം...

 

കോടമ്പാക്കം എന്ന ശവപ്പറമ്പ്

 

ഒരു സെപ്റ്റംബർ ഇരുപത്തിമൂന്നാം തിയതി കടന്നു പോയ സിൽക്ക് സ്മിതയെ കുറിച്ച് സഹതാരം അനുരാധയുടെ ചില ഓർമ്മകൾ ഫേസ്ബുക്കിൽ വായിച്ചു .
സിൽക്ക് സ്മിത
ഒരു കാലത്തെ നമ്മുടെ സണ്ണി ലിയോൺ ആയിരുന്നല്ലോ .സണ്ണി ലിയോണിനെ കാത്തു നിന്ന പോലെ അന്ന് ആളുകൾ അവരെ കാത്തു നിന്ന് കണ്ടിട്ടുണ്ട്.
അവർ കടിച്ച ആപ്പിൾ വരെ ലേലം കൊണ്ടിട്ടുണ്ട് .
അതൊന്നുമല്ല പറയാൻ വന്നത് .എന്റെ ചില അനുഭവങ്ങളാണ് .
പത്രപ്രവർത്തകനും തിരക്കഥാകൃത്തുമായിരുന്നു ജി എ ലാൽ ഒരിക്കൽ അവരോടു ഒരു അഭിമുഖം ചോദിച്ചിട്ടുണ്ട് .കടുത്ത നിഷേധമായിരുന്നു മറുപടി .ലാൽ അപ്പോൾ പറഞ്ഞു- എനിക്ക് വിജയലക്ഷ്മിയുടെ അഭിമുഖം ആണു വേണ്ടത് . ലാലിനെ നിമിഷങ്ങളോളം നോക്കി നിന്ന് കൊണ്ട് അവർ പറഞ്ഞു ... വിജയലക്ഷ്മി ഇരന്തു പോച് ....
ആന്ധ്രയിലെ ഏതോ ഗ്രാമത്തിൽ നിന്ന് കോടമ്പാക്കത്തെത്തിയ വിജയലക്ഷ്മി എന്ന നാടൻ പെൺകിടാവിനെ സിനിമ സിൽക്ക് സ്മിതയായി മാറ്റിപ്പണിയുകയായിരുന്നല്ലോ.അപ്പോഴും അവർ വിജയലക്ഷമിയെ സ്‌നേഹിച്ചിരുന്നിരിക്കണം .അല്ലെങ്കിൽ ആ പെൺകുട്ടി മരിച്ചുപോയെന്ന് അവർ പറയുമായിരുന്നോ . സ്നേഹത്തിന്റെ സങ്കടക്കടലിൽ ഉഴലുമ്പോഴാണല്ലോ നമ്മൾ നമ്മെ തന്നെ കൊന്നു കളയുന്നത് ....
ഒടുവിൽ സിൽക്ക് സ്മിത സിൽക്ക് സ്മിതയോട് ചെയ്തതും അത് തന്നെ .അവർ ഒരു സാരി തുമ്പിൽ അവരെ കെട്ടി തൂക്കി നമുക്കുള്ള അവസാന കാഴ്ച്ചയായി ..
ഞാൻ അന്ന് പത്രപ്രവർത്തകന്റെ വേഷത്തിൽ മദ്രാസിൽ ഉണ്ട് .അവരുടെ മരണം റിപ്പോർട്ട് ചെയ്യാൻ പോയ ജോൺസൻ ചിറമ്മൽ തിരിച്ചു വന്നു വിഷണ്ണനായി ....ആശുപതിയിൽ മൃതദേഹത്തിനടുത്തു അങ്ങനെ ആരുമില്ല ....
ഞാൻ അപ്പോൾ അറിയാതെ പറഞ്ഞു - ജീവിച്ചിരുന്നപ്പോൾ ആരധകർ ആഘോഷിച്ച ആ ശരീരം പ്രാണൻ പോയപ്പോൾ അവർക്കും വേണ്ടാ .അത് എഴുതൂ ജോൺസാ ....ജോൺസൻ പിന്നെ മൂകനായിരുന്നു ആ വാർത്ത എഴുതുന്നത് കണ്ടു .
നക്ഷത്രങ്ങളുടെ ആൽബം എന്ന എന്റെ നോവലിൽ സുചിത്ര എന്ന നടിയുണ്ട് .കോടമ്പാക്കം മാറ്റി തീർത്ത ഒരു ജീവിതം .അവർ സ്മിതയല്ല .അവരെ പോലുള്ള ഒരാൾ .
സ്മിത മരിച്ച രാത്രിയിൽ ഞാനും സുഹൃത്തായ ഷാജനും കോടമ്പാക്കത്തൂടെ നടന്നത് ഓർക്കുന്നു .അവിടെ ആരും സ്മിതയെ കുറിച്ച് സംസാരിക്കുന്നുണ്ടായിരുന്നില്ല .
കോടമ്പാക്കം വിജയലക്ഷ്മിമാരുടെ ശവപ്പറമ്പായിരുന്നു .
ജോർജ് സാർ ലേഖയുടെ മരണത്തിൽ അത് വരച്ചിട്ടിട്ടുണ്ട് ....ഞാനീ പറയുന്നതിനേക്കാൾ ഹൃദയസ്പൃക്കായി ....
സിൽക്ക് സ്മിതയും ആ സിനിമയും ഒക്കെ ...ഹോ വല്ലാത്ത ഓർമ്മകൾ തന്നെ.

OTHER SECTIONS