തിരുവനന്തപുരം: സംസ്ഥാനത്ത് കോവിഡ് വ്യാപനം നിയന്ത്രണ വിധേയമായതായി കേരളം കേന്ദ്രത്തെ അറിയിക്കും. കോവിഡ് രോഗികളുടെ എണ്ണത്തില് വര്ധനവ് ഉണ്ടായിട്ടുണ്ടെങ്കിലും ആശങ്കപ്പെടേണ്ട വിധം സാഹചര്യമില്ലെന്നാണ് കേരളത്തിന്റെ വിലയിരുത്തല്.
കേന്ദ്രമന്ത്രി ഇന്ന് വിളിച്ചുചേര്ത്ത യോഗത്തില് ആരോഗ്യമന്ത്രി കേരളത്തിലെ സാഹചര്യം വിശദീകരിക്കും.ഒമിക്രോണ് വകഭേദം സ്ഥിരീകരിച്ച സാഹചര്യത്തില് മുന്കരുതല് നടപടികള് ശക്തമാക്കിയിട്ടുണ്ടെന്നും ആശുപത്രി സംവിധാനങ്ങള് സജ്ജമെന്നുമാണ് കേരളം അറിയിക്കുക.
ആശുപത്രികളില് മാസ്ക് ധരിക്കണമെന്ന് ആരോഗ്യവകുപ്പ് നിര്ദ്ദേശം നല്കിയിട്ടുണ്ട്. ജില്ലകളുടെ അടിസ്ഥാനത്തില് ഐസോലേഷന് വാര്ഡുകള് സജ്ജമാക്കാനും നിര്ദ്ദേശമുണ്ട് രോഗലക്ഷണങ്ങള് ഉള്ളവരില് പരിശോധന ഉറപ്പാക്കും.
കൂടുതല് രോഗികളുള്ള എറണാകുളം, തിരുവനന്തപുരം ജില്ലകളില് പ്രത്യേക ശ്രദ്ധ വേണമെന്നും നിര്ദ്ദേശം നല്കിയിട്ടുണ്ട്. ഒമിക്രോണ് വകഭേദം റിപ്പോര്ട്ട് ചെയ്യപ്പെട്ടതിന് പിന്നാലെ ആരോഗ്യവകപ്പ് ഡയറക്ട്രേറ്റ് പ്രത്യേക റിപ്പോര്ട്ട് തയ്യാറാക്കിയിരുന്നു.
അതേസമയം, കോവിഡ് വ്യാപനത്തെ തുടര്ന്ന് ആശുപത്രികളില് മാസ്ക് ഉപയോഗിക്കണമെന്ന് ആരോഗ്യമന്ത്രിയുടെ അധ്യക്ഷതയില് ചേര്ന്ന ഉന്നതല യോഗത്തില് നിര്ദേശം നല്കിയിട്ടുണ്ട്.
ആരോഗ്യപ്രവര്ത്തകരും ആശുപത്രികളില് എത്തുന്ന രോഗികളും മാസ്ക് ഉപയോഗിക്കണമെന്നാണ് നിര്ദേശം. മാസ്ക് നിര്ബന്ധമാക്കിയിട്ടില്ലെങ്കിലും മുന്കരുതലായും രോഗ വ്യാപനം തടയാനും ഉപയോഗിക്കണമെന്നാണ് നിര്ദേശം നല്കിയിരിക്കുന്നത്.
കോവിഡ് രോഗ വ്യാപനം നിയന്ത്രണ വിധേയമാണെന്ന് ഉന്നതതല യോഗം വിലയിരുത്തി. അനാവശ്യ ഭീതി വേണ്ടെന്നും കടുത്ത നിയന്ത്രണങ്ങളും ആവശ്യമില്ലെന്നും യോഗം വ്യക്തമാക്കി.