സിവിൽ പൊലീസ് ഓഫീസർ തസ്തികയിൽ പിഎസ്സി പരീക്ഷ കഴിഞ്ഞ് ഫിസിക്കല്‍ ടെസ്റ്റിനായി ഓട്ട പരിശീലനം നടത്തുന്നതിനിടെ 22കാരി കുഴഞ്ഞുവീണു മരിച്ചു.

തൃശൂർ:സിവിൽ പൊലീസ് ഓഫീസർ തസ്തികയിൽ പിഎസ്സി പരീക്ഷ കഴിഞ്ഞ് ഫിസിക്കൽ ടെസ്റ്റിനായി ഓട്ട പരിശീലനം നടത്തുന്നതിനിടെ 22കാരി കുഴഞ്ഞുവീണു മരിച്ചു.

 തളിക്കുളം മുറ്റിച്ചൂർ റോഡ് കുരുട്ടിപ്പറമ്പിൽ സുരേഷിന്റെയും കവിതയുടെയും മകൾ ആദിത്യ (22) ആണ് മരിച്ചത്.

ഇന്നലെ രാവിലെ 7.15നാണ് സംഭവം. തളിക്കുളം ഗവ. ഹൈസ്‌കൂൾ ഗ്രൗണ്ടിൽ കൂട്ടികാരികളോടൊപ്പം പരിശീലനം നടത്തുന്നതിനിടെയാണ് യുവതി കുഴഞ്ഞുവീണത്.

 ഉടൻ വലപ്പാട് സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാൻ സാധിച്ചില്ല. തളിക്കുളത്തെ ഓട്ടോ ഡ്രൈവറായ പിതാവ് സുരേഷാണ് ഓട്ടോയിൽ ആദിത്യയെ ഗ്രൗണ്ടിൽ വിട്ടത്.

ആദിത്യയുടെ മൃതദേഹം മെഡിക്കൽ കോളജ് ആശുപത്രിയിൽ പോസ്റ്റ്‌മോർട്ടം നടത്തി. ഹൃദയാഘാതമാണ് മരണകാരണമെന്നാണ് പോസ്റ്റ്‌മോർട്ടത്തിലെ കണ്ടെത്തൽ.

 യുവതിക്ക് ഹൃദയ വാൽവിനുണ്ടായിരുന്ന തകരാറാണ് പെട്ടെന്നുള്ള മരണത്തിലേക്ക് നയിച്ചതെന്ന് പോസ്റ്റ്‌മോർട്ടം നടത്തിയ ഫൊറൻസിക് വിഭാഗം മേധാവി പൊലീസിന് കൈമാറിയ പ്രാഥമിക റിപ്പോർട്ടിൽ വ്യക്തമാക്കിയിട്ടുണ്ട്.

 നാട്ടിക എസ്എൻ കോളജിലെ ബിഎസ്സി ബിരുദധാരിയാണ് ആദിത്യ.