സംസ്ഥാനത്തിലൂടെ സർവീസ് നടത്തുന്ന രണ്ട് ട്രെയിനുകൾക്ക് പുതിയ സ്റ്റോപ്പ് അനുവദിച്ചെന്ന് റെയിൽവേ മന്ത്രി അശ്വിനി വൈഷ്ണവ് അറിയിച്ചതായി ആലപ്പുഴ എംപി കെസി വേണുഗോപാൽ

ആലപ്പുഴ: സംസ്ഥാനത്തിലൂടെ സർവീസ് നടത്തുന്ന രണ്ട് ട്രെയിനുകൾക്ക് പുതിയ സ്റ്റോപ്പ് അനുവദിച്ചെന്ന് റെയിൽവേ മന്ത്രി അശ്വിനി വൈഷ്ണവ് അറിയിച്ചതായി ആലപ്പുഴ എംപി കെസി വേണുഗോപാൽ.

തന്നെ ഫോൺ ചെയ്താണ് റെയിൽവേ മന്ത്രി ഇക്കാര്യം പറഞ്ഞതെന്ന് കെസി വേണുഗോപാൽ അറിയിച്ചു. മറ്റ് നിരവധി ആവശ്യങ്ങൾ മന്ത്രിയ്ക്ക് മുന്നിൽ വെച്ചിട്ടുണ്ടെന്നും അനുകൂല നടപടി അദ്ദേഹം ഉറപ്പ് നൽകിയിട്ടുണ്ടെന്നും കെസി വേണുഗോപാൽ പറഞ്ഞു.

ഹംസഫർ എക്‌സ്പ്രസിന് കായംകുളത്തും രാജ്യറാണി എക്‌സ്പ്രസിന് കരുനാഗപ്പള്ളിയിലുമാണ് പുതുതായി സ്റ്റോപ്പുകൾ അനുവദിച്ചിരിക്കുന്നത്.

വന്ദേ ഭാരതിനുൾപ്പെടെ 11 ട്രെയിനുകൾക്ക് കായംകുളത്ത് സ്റ്റോപ്പ് അനുവദിക്കണമെന്ന് ആവശ്യപ്പെട്ടിട്ടുണ്ടെന്നും കരുനാഗപ്പള്ളിയിൽ എട്ടു ട്രെയിനുകൾക്കാണ് സ്റ്റോപ്പ് ആവശ്യപ്പെട്ടതെന്നും പറഞ്ഞ കെസി വേണുഗോപാൽ ഇവ അനുവദിക്കുമെന്നാണ് പ്രതീക്ഷിക്കുന്നതെന്നും പറഞ്ഞു .യാത്രക്കാരെ സംബന്ധിച്ചു വളരെ സന്തോഷം നൽകുന്ന വാർത്തയാണ് കിട്ടിയിരിക്കുന്നതെന്നു മന്ത്രി പറഞ്ഞു .