സംസ്ഥാന കോണ്‍ഗ്രസ് നേതൃത്വവുമായുള്ള നിസ്സഹകരണത്തിന് പ്രതിപക്ഷ നേതാവ് വിഡി സതീശന് കോൺ​ഗ്രസ് ഹൈക്കമാൻഡിന്റെ താക്കീത്.

തിരുവനന്തപുരം: സംസ്ഥാന കോൺഗ്രസ് നേതൃത്വവുമായി നല്ലരീതിയിൽ  സഹകരിക്കാത്തതിന്  പ്രതിപക്ഷ നേതാവ് വിഡി സതീശന് കോൺ​ഗ്രസ് ഹൈക്കമാൻഡിന്റെ രൂക്ഷമായ താക്കീത്.

 നിയമസഭ തെരഞ്ഞെടുപ്പ് മുന്നൊരുക്കങ്ങൾ ചർച്ച ചെയ്യാനായി ഡൽഹി ഇന്ദിരാഭവനിൽ ചേർന്ന നേതൃയോഗത്തിലാണ് നാടകീയ സംഭവങ്ങളുണ്ടായത്.

 യോഗത്തിൽ കെപിസിസി പ്രസിഡന്റ് സണ്ണി ജോസഫും പ്രതിപക്ഷ നേതാവ് വിഡി സതീശനും തമ്മിൽ വാക്‌പോരുണ്ടായി.

രാഹുൽ ഗാന്ധി ഇടപെട്ടാണ് രംഗം ശാന്തമാക്കിയത്.ഇത്തരം പെരുമാറ്റങ്ങൾ അംഗീകരിക്കാനാകില്ലെന്നും, എല്ലാ നേതാക്കളും പാർട്ടി യോഗങ്ങളിൽ പങ്കെടുക്കുന്നത് ഉറപ്പാക്കണമെന്നും രാഹുൽഗാന്ധി ആവശ്യപ്പെട്ടുവെന്ന് യോഗത്തിൽ പങ്കെടുത്ത നേതാവ് വ്യക്തമാക്കിയതായി പറയുന്നു .

യോഗത്തിൽ ആരും വി ഡി സതീശനെ പിന്തുണച്ചില്ല. പ്രസിഡന്റ് മല്ലികാർജുൻ ഖാർഗെയുടെ അധ്യക്ഷതയിൽ ചേർന്ന യോഗത്തിൽ, രാഹുൽഗാന്ധി, പ്രിയങ്കഗാന്ധി എന്നിവർക്ക് പുറമെ കേരളത്തിൽ നിന്നുള്ള നേതാക്കളായ സണ്ണി ജോസഫ്, വിഡി സതീശൻ, കെ മുരളീധരൻ, രമേശ് ചെന്നിത്തല, എംഎം ഹസ്സൻ, കൊടിക്കുന്നിൽ സുരേഷ്, ശശി തരൂർ, മൂന്ന് കെപിസിസി വർക്കിങ് പ്രസിഡന്റുമാർ എന്നിവർ പങ്കെടുത്തു.