എറണാകുളം ബംഗളൂരു റൂട്ടില്‍ പുതിയ വന്ദേഭാരത്

തിരുവനന്തപുരം: എറണാകുളം ബംഗളൂരു റൂട്ടില്‍ പുതിയ വന്ദേഭാരത് അനുവദിച്ചതായി ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍. ' എറണാകുളത്തു നിന്നും തൃശൂര്‍, പാലക്കാട് വഴി ബംഗളൂരുവിലേക്ക് വന്ദേ ഭാരത് ട്രെയിന്‍ അനുവദിച്ച കേന്ദ്രസര്‍ക്കാരിന് നന്ദി ' എന്ന് അറിയിച്ചുകൊണ്ട് രാജിവ് ചന്ദ്രശേഖര്‍ ഫേസ്ബുക്കില്‍ വിവരം പങ്കുവെച്ചു. ബസ്സുകള്‍ അമിത നിരക്ക് ഈടാക്കുന്നതിനാല്‍ ഈ സര്‍വീസ് മലയാളികള്‍ ഉള്‍പ്പെടെ സഹായകരമായിരിക്കും എന്നും രാജിവ് ചന്ദ്രശേഖര്‍ പറഞ്ഞു. അതേസമയം റെയില്‍വേയുടെ ഭാഗത്തുനിന്നും കേന്ദ്രസര്‍ക്കാരിന്റെ ഭാഗത്തുനിന്നോ ഔദ്യോഗിക പ്രഖ്യാപനം വന്നിട്ടില്ല.
രാജീവ് ചന്ദ്രശേഖരന്റെ പോസ്റ്റിന്റെ പൂര്‍ണ്ണരൂപം
നന്ദി മോദി!

എറണാകുളത്ത് നിന്നും തൃശൂര്‍ പാലക്കാട് വഴി ബംഗളൂരുവിലേക്ക് വന്ദേ ഭാരത് ട്രെയിന്‍ അനുവദിച്ച കേന്ദ്ര സര്‍ക്കാരിന് നന്ദി. 

ഐടി മേഖലയില്‍ അടക്കം ഒട്ടേറെ മലയാളികള്‍ ജോലിചെയ്യുന്ന നഗരമാണ് ബംഗളൂരു. അവിടേക്ക് കേരളത്തില്‍ നിന്നും കൂടുതല്‍ ട്രെയിനുകള്‍ അനുവദിക്കണമെന്ന് വളരെ നാളായുള്ള ആവശ്യമാണ്. ഇക്കാര്യം ഒരു മാസം മുന്‍പ് റെയില്‍വേ മന്ത്രി അശ്വിനി വൈഷ്ണവ്ജിയുടെ ശ്രദ്ധയില്‍പ്പെടുത്തിയിരുന്നു. ഉടന്‍തന്നെ അനുകൂല തീരുമാനം ഉണ്ടായതിന് അദ്ദേഹത്തിന് നന്ദി അറിയിക്കുന്നു. നവംബര്‍ പകുതിയോടെ ഈ ട്രെയിന്‍ സര്‍വീസ് തുടങ്ങുമെന്ന് അദ്ദേഹം ഉറപ്പു നല്‍കിയിട്ടുണ്ട്. നിലവില്‍ ഉത്സവ സീസണിലും വിശേഷദിവസങ്ങളിലും ഈ റൂട്ടില്‍ വലിയ തിരക്കാണ് അനുഭവപ്പെടുന്നത്. മാത്രമല്ല മറ്റു ഗതാഗതം മാര്‍ഗ്ഗങ്ങള്‍ തേടുന്നവര്‍ക്ക് അമിത യാത്ര കൂലിയും നല്‍കേണ്ടി വരുന്നുണ്ട്.

പുതിയ വന്ദേ ഭാരത് സര്‍വീസ് ബംഗളൂരു മലയാളികളെ സംബന്ധിച്ച് ഏറെ ആശ്വാസകരമാകും. കേരളത്തിന്റെ സമഗ്ര വികസനം മുന്നില്‍ക്കണ്ട് അനുകൂല തീരുമാനങ്ങള്‍ എടുക്കുന്ന കേന്ദ്രസര്‍ക്കാരിന് ഒരിക്കല്‍ കൂടി നന്ദി അറിയിക്കുന്നു' എന്നാണ് അദ്ദേഹം കുറിച്ചത്.