കേരളത്തെ രാജ്യത്തെ ആദ്യ അതിദാരിദ്ര്യമുക്ത സംസ്ഥാനമാക്കിക്കൊണ്ടുള്ള പ്രഖ്യാപനവുമായി സർക്കാർ

തിരുവനന്തപുരം: നവംബർ ഒന്നിന് കേരളപ്പിറവി ദിനത്തിൽ കേരളത്തെ രാജ്യത്തെ ആദ്യ അതിദാരിദ്ര്യമുക്ത സംസ്ഥാനമായി പ്രഖ്യാപിക്കാനൊരുങ്ങി  സർക്കാർ .ദാരിദ്ര്യനിർമ്മാർജ്ജന പദ്ധതികളിൽ ഉൾപ്പെടാതെ പോയ അതിദരിദ്രരെ കണ്ടെത്തി, അവരെ അതിജീവനത്തിന് സഹായിക്കുന്ന സമഗ്രമായ പദ്ധതിയാണ് കേരള സർക്കാർ ഇപ്പോൾ നടപ്പിലാക്കികൊണ്ടിരിക്കുന്നത് .

ഭക്ഷണം, സുരക്ഷിതമായ പാർപ്പിടം ,ജീവിക്കാനാവശ്യമായ  അടിസ്ഥാന വരുമാനം, ആരോഗ്യ സംരക്ഷണം  എന്നീ നാല് ഘടകങ്ങളെ അടിസ്ഥാനമാക്കി,വലിയ  ജനകീയ പങ്കാളിത്തത്തോടെ നടത്തിയ സർവേയിലൂടെ 64,006 അതിദരിദ്ര കുടുംബങ്ങളെയാണ് കണ്ടെത്താൻ കഴിഞ്ഞത് .

2021 ജൂലൈ മുതൽ 2022 ജനുവരി വരെ നീണ്ടുനിന്ന ഇത്തരം  പ്രവർത്തനങ്ങളിലൂടെ ഈ പ്രക്രിയപൂർത്തിയാക്കാൻ കഴിഞ്ഞു .

ഓരോ കുടുംബത്തിൻ്റെയും പ്രശ്നങ്ങളും ആവശ്യകതകളും പ്രത്യേകമായി പരിഗണിച്ച്, അവരെ നിലവിലുള്ള അവസ്ഥയിൽ നിന്ന് കരകയറ്റാൻ സഹായിക്കുന്ന സൂക്ഷ്മതല പദ്ധതികളായ മൈക്രോ പ്ലാനുകൾ രൂപീകരിക്കുകയും'അവകാശം അതിവേഗം' പദ്ധതിയിലൂടെ കൈവശാവകാശ രേഖകൾ, പാചകവാതക, വൈദ്യുതി കണക്ഷനുകൾ എന്നിവ അതിവേഗം ലഭ്യമാക്കുകയും ചെയ്തു .

ലൈഫ് ഭവന പദ്ധതിയിൽ 11,340 അതിദരിദ്ര കുടുംബങ്ങളെ പുതുതായി ഉൾപ്പെടുത്തി. ആരോഗ്യം, വിദ്യാഭ്യാസം തുടങ്ങിയ മേഖലകളിൽ വിവിധ സർക്കാർ വകുപ്പുകളുടെയും ഏജൻസികളുടെയും കൂട്ടായ പ്രവർത്തനം വഴി ചികിത്സാ സഹായം, കൗൺസലിങ്, വൊക്കേഷണൽ ട്രെയിനിങ് ഉൾപ്പെടെയുള്ള സേവനങ്ങൾ ഉറപ്പാക്കി.

അവസാനത്തെ മനുഷ്യനും ക്ഷേമം ഉറപ്പാക്കാനും അന്തസ്സുള്ള ജീവിതം ലഭ്യമാക്കാനുമുള്ള ഈ പദ്ധതി, നവകേരള നിർമ്മിതിയിലേക്കുള്ള പ്രധാന ചുവടുവെയ്പ്പായാണ് കണക്കാക്കുന്നത്.

 ധര്‍മ്മടം നിയോജകമണ്ഡലമാണ് കേരളത്തില്‍ ആദ്യമായി അതിദാരിദ്ര്യമുക്തമായത്. കോട്ടയമായിരുന്നു അതിദരിദ്രരില്ലാത്ത ആദ്യ ജില്ലയായി പ്രഖ്യാപിക്കപ്പെട്ടത്.

2021ൽ സർക്കാർ അധികാരത്തിലെത്തിയപ്പോൾ എടുത്ത ആദ്യതീരുമാനമാണ് 2025 നവംബർ ഒന്നിന് സംസ്ഥാനത്തെ അതിദാരിദ്ര്യമുക്തമാക്കുകയെന്നത്.

 അതിനായി എല്ലാ വകുപ്പുകളുടെയും ഏകോപനത്തോടെയുള്ള പ്രവർത്തനങ്ങളാണ് നടന്നത്. പദ്ധതിയുടെ ഭാഗമായി അലഞ്ഞുതിരിഞ്ഞ് നടക്കുന്നവർ, മാനസികവെല്ലുവിളി നേരിടുന്നവർ എന്നിവരെ പുനരധിവസിപ്പിക്കാനും, ചികിത്സയ്ക്കുമുള്ള നടപടികൾ സ്വീകരിച്ചു.

ഇന്ത്യയില്‍ അതിദരിദ്രരില്ലാത്ത ഏക സംസ്ഥാനം കേരളം ആണെന്ന് അഭിമാനത്തോടെ പറയാൻ സാധിക്കുമെന്ന് മന്ത്രി പിഎ മുഹമ്മദ് റിയാസ് കഴിഞ്ഞദിവസം പറഞ്ഞിരുന്നു. 

വൻകിട വികസനത്തിനൊപ്പം ജനജീവിതത്തെ സ്പർശിക്കുന്ന പദ്ധതിക്കും സംസ്ഥാനം പ്രാധാന്യം നൽകുന്നുവെന്നും മന്ത്രി പറഞ്ഞു. അതിദരിദ്രരില്ലാത്ത കോർപ്പറേഷനായി കോഴിക്കോട് കോർപ്പറേഷനെ പ്രഖ്യാപിച്ചുകൊണ്ട് സംസാരിക്കുകയായിരുന്നു മന്ത്രി.