ആളിയാര്‍ ഡാമിന് സമീപം പുതിയ പമ്പ് സ്റ്റോറേജ് ജല വൈദ്യുതി പദ്ധതി സ്ഥാപിക്കാനുള്ള തമിഴ്‌നാടിന്റെ നീക്കത്തില്‍ കേരളത്തിന് പ്രതിഷേധം.

കൊച്ചി: ആളിയാർ ഡാമിന് സമീപം പുതിയ പമ്പ്ഡ് സ്റ്റോറേജ് ജല വൈദ്യുതി പദ്ധതി സ്ഥാപിക്കാനുള്ള തമിഴ്‌നാടിന്റെ നീക്കത്തിൽ കേരളത്തിന് പ്രതിഷേധം.

 പറമ്പിക്കുളം ആളിയാർ പദ്ധതിയുമായി ബന്ധപ്പെട്ട കരാറിന് വിരുദ്ധമാണ് തമിഴ്‌നാടിന്റെ നീക്കം എന്നാണ് കേരളത്തിന്റെ വാദം.

 11721 കോടി മുതൽ മുടക്കിൽ തമിഴ്‌നാട് സ്ഥാപിക്കുന്ന പദ്ധതി കേരളത്തിലേക്കുള്ള ജലപ്രവാഹത്തെ സാരമായി ബാധിക്കും എന്നാണ് സംസ്ഥാനത്തിന്റെ നിലപാട്.

അന്തർസംസ്ഥാന ജല വിഷയത്തിൽ കേരളവും തമിഴ്നാടും തമ്മിൽ വീണ്ടും ഭിന്നത രൂപം കൊള്ളുന്നു എന്നാണ് പുതിയ റിപ്പോർട്ടുകൾ.

 സംസ്ഥാനത്തിന്റെ ആശങ്കകൾ വകവയ്ക്കാതെ തമിഴ്നാട് മുന്നോട്ട് പോയാൽ കേരളം പരാതിയുമായി കേന്ദ്ര ഇലക്ട്രിക്കൽ അതോറിറ്റി, കേന്ദ്ര ജല കമ്മീഷൻ, പരിസ്ഥിതി വനം മന്ത്രാലയം എന്നിവയെ സമീപിക്കണം എന്നാണ് ഈ മേഖലയിലെ വിദഗ്ദരുടെ നിലപാട്.

 സുപ്രീം കോടതിയിലും വിഷയം ഉന്നയിക്കാമെന്നും വിദഗ്ദർ പറയുന്നു. അന്തർസംസ്ഥാന നദീജല തർക്ക നിയമത്തിലെ സെക്ഷൻ 3 പ്രകാരം, ഒരു അന്തർസംസ്ഥാന നദീതടത്തിലെയോ നദീതടത്തിലെയോ ജലത്തിൽ മറ്റൊരു സംസ്ഥാനവുമായി ജല തർക്കം ഉണ്ടായിട്ടുണ്ടെന്നോ ഉണ്ടാകാൻ സാധ്യതയുള്ള സാഹചര്യത്തിലോ വിഷയം ഒരു ട്രൈബ്യൂണലിന് വിടാൻ കേന്ദ്രത്തോട് അഭ്യർത്ഥിക്കാൻ സാധിക്കും.