റോഡ്, മെട്രോ, ജലഗതാഗതം ബന്ധിപ്പിക്കുമെന്നും ഒറ്റ ടിക്കറ്റ് സംവിധാനം പരിഗണനയിൽ ഉണ്ടെന്നും മന്ത്രി ഗണേഷ്‌കുമാർ പറഞ്ഞു

തിരുവനന്തപുരം: റോഡ്, മെട്രോ, ജലഗതാഗതം എന്നിവയെ പരസ്പരം ബന്ധിച്ച് ഒറ്റ ടിക്കറ്റ് സംവിധാനം ഏർപ്പെടുത്തുന്നതിനെപ്പറ്റി ചിന്തിക്കുന്നുണ്ടെന്നു  ഗതാഗത വകുപ്പ് മന്ത്രി കെ ബി ഗണേഷ് കുമാർപറഞ്ഞു .

ഒറ്റ ടിക്കറ്റെടുക്കുന്ന വ്യക്തിക്ക് ഈ മൂന്ന് സൗകര്യവും ഉപയോഗിക്കാനാകുമെന്നും പൊതുഗതാഗതം കൂടുതൽ കാര്യക്ഷമമാകുമെന്നും മന്ത്രി പറഞ്ഞു. വിഷൻ 2031 ന്റെ ഭാഗമായി ഗതാഗത വകുപ്പ് സംഘടിപ്പിച്ച സെമിനാറിലാണ് ഈ നിർദേശം വന്നത്.ചർച്ചയിലൂടെ ഉരുത്തിരിഞ്ഞ ആശയങ്ങൾ മുഖ്യമന്ത്രിയുടെ ശ്രദ്ധയിൽ പെടുത്തുമെന്ന് മന്ത്രി വ്യക്തമാക്കി.

ജല, റോഡ് ഗതാഗതത്തെ ബന്ധിപ്പിച്ച് ട്രാൻസ്പോർട്ട് ഹബിൻറെ സാധ്യത പരിശോധിക്കും. നിലവിൽ എറണാകുളം വൈറ്റില ഹബിൽ കാര്യക്ഷമമായി ഇത് പ്രവർത്തിക്കുന്നുണ്ടെന്ന് മന്ത്രി പറഞ്ഞു.

 ദേശീയ പാതയോരങ്ങളിൽ ഗ്രാമപഞ്ചായത്തുകളുടെ കൈവശമുള്ള സ്ഥലം വിട്ടുനൽകുകയാണെങ്കിൽ കണ്ടെയ്നറുകൾ പോലുള്ള വലിയ വാഹനങ്ങൾക്കായി പാർക്കിങ് സൗകര്യം ഒരുക്കും.

എൻഫോഴ്സമെന്റ് ഏജൻസികളിൽ സ്ത്രീകളുടെ പ്രാതിനിധ്യം ഉറപ്പാക്കുമെന്നും മന്ത്രി വ്യക്തമാക്കി. ഗതാഗതമേഖലയിൽ പുത്തൻ നൂതന ആശയങ്ങൾ കൊണ്ട് വരാനും അത് നടപ്പിലാക്കാനുമാണ് ഗതാഗത വകുപ്പും സർക്കാരും ചേർന്ന് വളരെയധികം വ്യത്യസ്തമായ പദ്ധതികൾ ആവിഷ്കരിക്കുന്നുണ്ടെന്നും മന്ത്രി പറഞ്ഞു .