ഏഷ്യൻ പെയിന്‍റ്സ്, കാഡ്ബറി,ഫെവിക്കോള്‍ എന്നീ ശ്രദ്ധേയ ഹിറ്റ്‌ പരസ്യങ്ങളുടെ ശില്പി ആയ പിയുഷ് പാണ്ഡെ വിടവാങ്ങി

ന്യൂഡൽഹി:ഫെവിക്കോൾ, കാഡ്ബറി, ഏഷ്യൻ പെയിന്റ്‌സ് തുടങ്ങിയ ബ്രാൻഡുകളുടെ ശ്രദ്ധനേടിയ പരസ്യങ്ങൾക്ക് പിന്നിലെ ശില്പി ആയിരുന്ന   ഇന്ത്യൻ പരസ്യ ലോകത്തെ ഇതിഹാസം പിയുഷ് പാണ്ഡെ(70) അന്തരിച്ചു. അണുബാധയെത്തുടർന്നായിരുന്നു മരണം.

 സംസ്‌കാരം ശനിയാഴ്ച നടക്കും.
ഇന്ത്യൻ പരസ്യരംഗത്തെ ശബ്ദമായിരുന്ന പിയുഷ് പാണ്ഡെ ഏകദേശം നാല് പതിറ്റാണ്ടായി പരസ്യ മേഖലയിൽ പ്രവർത്തിച്ചു വരികയായിരുന്നു.

 പരസ്യ നിർമാണ കമ്പനിയായ ഒഗിൽവിയുടെ വേൾഡ്വൈഡ് ചീഫ് ക്രിയേറ്റീവ് ഓഫീസറും ഇന്ത്യയിലെ എക്‌സിക്യൂട്ടീവ് ചെയർമാനുമായിരുന്നു.1982 ലാണ് പിയൂഷ് പാണ്ഡെ ഒഗിൽവിയിൽ എത്തുന്നത്.

 സൺലൈറ്റ് ഡിറ്റർജന്റിന് വേണ്ടിയായിരുന്നു ആദ്യ പരസ്യം തയാറാക്കിയത്. ആറ് വർഷത്തിന് ശേഷം, കമ്പനിയുടെ ക്രിയേറ്റീവ് ഡിപ്പാർട്ട്മെന്റിലെത്തിയ അദ്ദേഹം ഫെവിക്കോൾ, കാഡ്ബറി, ഏഷ്യൻ പെയിന്റ്‌സ്, ലൂണ മോപെഡ്, ഫോർച്യൂൺ ഓയിൽ, തുടങ്ങി നിരവധി ബ്രാൻഡുകൾക്കായി ശ്രദ്ധേയമായ പരസ്യങ്ങൾ നിർമിച്ചു. പാണ്ഡെയുടെ നേതൃത്വത്തിൽ ഓഗിൽവി ഇന്ത്യയിലെ ഒന്നാം നമ്പർ പരസ്യ ഏജൻസിയായി വളർന്നു. 2016 ൽ പത്മശ്രീ ലഭിച്ചതുൾപ്പെടെ നിരവധി പുരസ്‌കാരങ്ങൾ നേടിയിട്ടുണ്ട്.

ദേശീയോദ്ഗ്രഥനം പ്രോത്സാഹിപ്പിക്കുന്നതിനായി ദൂരദർശൻ തയ്യാറാക്കിയ മിലേ സുർ മേരേ തുമാര എന്ന വിഡിയോ ആൽബത്തിനു വേണ്ടി വരികൾ രചിച്ചത് പിയൂഷ് പാണ്ഡെയാണ്.

ജോൺ അബ്രഹാം നായകനായ മദ്രാസ് കഫേ ഉൾപ്പെടെ ഏതാനും സിനിമകളിൽ അഭിനയിച്ചിട്ടുണ്ട്. ഭോപാൽ എക്സ്പ്രസിൽ തിരക്കഥാ രചയിതാവായി.പിയുഷ് പാണ്ഡെയുടെ വിയോഗത്തിൽ വിവിധ മേഖലകളിൽ നിന്നുള്ളവർ ആദരാഞ്ജലികൾ അർപ്പിച്ചു.

 'ഇന്ത്യൻ പരസ്യ രംഗത്തെ അതികായകനും ഇതിഹാസവുമായ പണ്ഡെ ദൈനംദിന ശൈലികൾ, സാധാണക്കാരിലേക്ക് എത്തുന്ന നർമ്മം, എന്നിവയിലൂടെ ആശയവിനിമയം നടത്തി. പല അവസരങ്ങളിൽ അദ്ദേഹവുമായി സംസാരിക്കാനിടയായിട്ടുണ്ട്.

 അദ്ദേഹത്തിന്റെ പാരമ്പര്യം തലമുറകളെ പ്രചോദിപ്പിക്കും. അദ്ദേഹത്തിന്റെ വിയോഗത്തിൽ കുടുംബത്തിനും സുഹൃത്തുക്കൾക്കുമൊപ്പം ഹൃദയംഗമമായ അനുശോചനം അറിയിക്കുന്നു. കേന്ദ്ര ധനമന്ത്രി നിർമല സീതാരാമൻ എക്‌സിൽ കുറിച്ചു.