ശബരിമലയിലെ മേൽശാന്തിക്ക് പുതിയ സഹായികളെ നൽകാൻ ആലോചനയുണ്ടെന്നും അതിനായി പോലീസ് വെരിഫിക്കേഷൻ നിർബന്ധമാക്കുമെന്നും പി എസ് പ്രശാന്ത്

തിരുവനന്തപുരം:ശബരിമലയിൽ മേൽശാന്തിക്കുള്ള സഹായികളെ ദേവസ്വം ബോർഡ് നേരിട്ട് നൽകാൻ ആലോചിക്കുന്നുണ്ടെന്നും ഇതിനായി പൊലീസ് വെരിഫിക്കേഷൻ നിർബന്ധമാക്കുമെന്നും പി എസ് പ്രശാന്ത് പറഞ്ഞു .

ദേവസ്വം ബോർഡിന് കീഴിലുള്ള ക്ഷേത്രങ്ങളിലെ മേൽശാന്തിമാരെ ഇതിനായി തെരഞ്ഞെടുക്കുമെന്നും അദ്ദേഹം വ്യക്തമാക്കി .

നിലവിലെ പ്രശ്നങ്ങൾക്ക് വഴിവെച്ചത് ചില അവതാരങ്ങളാണെന്നും അദ്ദേഹം കുറ്റപ്പെടുത്തി.ശബരിമല സ്വർണമോഷണത്തിൽ അന്വേഷണം നടക്കുന്നത് ശരിയായ ദിശയിലാണെന്നും പി എസ് പ്രശാന്ത് പറഞ്ഞു .

ഉപ്പ് തിന്നവൻ വെള്ളം കുടിക്കണംഎന്നുള്ളതാണ് തന്റെ  നിലപാട് എന്നും അദ്ദേഹം വ്യക്തമാക്കി . അന്വേഷണത്തിൽ ആശങ്കകൾ ഒന്നുമില്ല. കോടതി ഉത്തരവിൽ ദേവസ്വം ബോർഡ്‌ പ്രസിഡൻറിനെതിരെയുള്ള പരാമർശം നീക്കാൻ സമീപിച്ചിട്ടുണ്ട്.

തന്നെ അറസ്റ്റ് ചെയ്യാൻ നീക്കമെന്ന് പറഞ്ഞ് ഒരു ചാനലിൽ വാർത്ത വന്നു. എന്ത് അടിസ്ഥാനത്തിലാണ് ചോദ്യം ചെയ്യുന്നുവെന്ന് പറയുന്നതെന്നും പി എസ് പ്രശാന്ത് ചോദിച്ചു.

ഇപ്പോൾ നടന്ന കാര്യങ്ങളെല്ലാം വളരെയധികം ആശങ്ക ജനിപ്പിക്കുന്ന തരത്തിലുള്ള കാര്യങ്ങളാണെന്നും കുറ്റക്കാരെയെല്ലാം സമൂഹത്തിനുമുന്നിൽ കൊണ്ടുവരുമെന്നും അദ്ദേഹം പറഞ്ഞു .