ശബരിമല സ്വർണമോഷണത്തിൽ മുൻ ദേവസ്വം പ്രസിഡന്റ് എൻ വാസുവിനെ എസ് എ ടി ചോദ്യം ചെയ്തു

പത്തനംതിട്ട: ശബരിമലയിൽ നടന്ന  സ്വർണമോഷണവുമായി ബന്ധപ്പെട്ട അന്വേഷണത്തിൽ  മുൻ ദേവസ്വം പ്രസിഡന്റ് എൻ വാസുവിനെ ചോദ്യം ചെയ്ത് എസ്‌ഐടി.

വാസുവിന്റെ പി എ ആയിരുന്ന സുധീഷ് കുമാറിന്റെ അറസ്റ്റിന് പിന്നാലെയാണ് മൊഴിയെടുത്തത്. 

എസ് പി ശശിധരൻ ആണ് മുൻ ദേവസ്വം കമ്മീഷണർ കൂടിയായിരുന്ന എൻ വാസുവിന്റെ മൊഴിയെടുത്തത്.

ശബരിമലയിൽ സ്വർണപ്പാളി കടത്തിക്കൊണ്ടുപോയ സംഭവം നടക്കുമ്പോൾ എക്‌സിക്യൂട്ടീവ് ഓഫീസറായിരുന്നു നേരത്തെ അറസ്റ്റിലായ സുധീഷ് കുമാർ. പിന്നീട് എൻ വാസു പ്രസിഡന്റായപ്പോൾ അദ്ദേഹത്തിന്റെ പിഎ ചുമതലയിലേക്കും സുധീഷ് എത്തുകയായിരുന്നു.

ഈ സാഹചര്യത്തിലാണ് ഗൂഢാലോചന സംബന്ധിച്ച എൻ വാസുവിലേക്കും എത്തിയിരിക്കുന്നത്.

സ്വർണക്കടത്ത് സംബന്ധിച്ച് എൻ വാസുവിനോ അദ്ദേഹത്തിന്റെ ഓഫീസിനോ അറിവുണ്ടായിരുന്നോ എന്നാണ് അന്വേഷണ സംഘം പരിശോധിക്കുന്നത്.

ശബരിമല ശ്രീകോവിലിലെ കട്ടിളപാളി, ദ്വാരപാലക ശില്പങ്ങൾ എന്നിവയിലെ സ്വർണ്ണം അപഹരിച്ച രണ്ട് കേസുകളിലും പ്രതിയാണ് അടൂർ സ്വദേശിയായ മുൻ എക്‌സിക്യൂട്ടീവ് ഓഫീസർ ഡി സുധീഷ് കുമാർ.

 സുപ്രധാന ചുമതലയിലിരുന്ന സുധീഷ്‌കുമാർ ബോധപൂർവ്വം ഈ വീഴ്ചകൾ വരുത്തിയത് തട്ടിപ്പിന് വേണ്ടിയെന്നാണ് എസ്‌ഐടിയുടെ നിലപാട്.

 കൂടുതൽ ചോദ്യം ചെയ്യലിനായി സുധീഷ്‌കുമാറനെ ഇന്ന് അന്വേഷണ സംഘം കസ്റ്റഡിയിൽ വാങ്ങും.

അതേസമയം സ്വർണമോഷണ കേസിലെ മുഖ്യ പ്രതിയായ ഉണ്ണികൃഷ്ണൻ പോറ്റിയെ ശബരിമല ശ്രീകോവിൽ കട്ടിളപ്പാളിയിലെ സ്വർണ്ണം കവർച്ച ചെയ്ത കേസിൽ ഇന്ന് അറസ്റ്റ് രേഖപ്പെടുത്തും. ആദ്യത്തെ കേസിൽ ഉണ്ണികൃഷ്ണൻ പോറ്റിയെ, 14 ദിവസത്തേക്കാണ് കസ്റ്റഡിയിൽ വിട്ടത്. കേസിലെ മറ്റൊരു പ്രതി മുരാരി ബാബു ഇന്ന് ജാമ്യാപേക്ഷ സമർപ്പിച്ചേക്കും.