പേരാമ്പ്രയിലേത് ആസൂത്രിത അക്രമണമെന്നും തന്നെ മര്‍ദ്ദിച്ചത് 'പിരിച്ചുവിട്ട' പൊലീസ് ഉദ്യോഗസ്ഥന്‍ ആണെന്നും ആരോപണങ്ങളുമായി ഷാഫി പറമ്പില്‍

കോഴിക്കോട്: പേരാമ്പ്ര സംഘർഷത്തിൽ പൊലീസിനെതിരെ ഗുരുതര ആരോപണണങ്ങളുമായി ഷാഫി പറമ്പിൽ എംപി. പൊലീസ് ആസൂത്രിത ആക്രമണം നടത്തുകയായിരുന്നു.

സംഘർഷത്തിന് പിന്നിൽ ഗൂഢാലോചന നടന്നിട്ടുണ്ട്. സംഘർഷത്തിനിടെ തന്നെ മർദ്ദിച്ചത് സിഐ ആയ അഭിലാഷ് ഡേവിഡ് എന്ന പൊലീസ് ഉദ്യോഗസ്ഥനാണ്.

 ഇയാൾ സിപിഎമ്മിന്റെ ഗുണ്ടയാണെന്നും കോഴിക്കോട് വാർത്താ സമ്മേളനത്തിൽ ഷാഫി പറമ്പിൽ ആരോപിച്ചു.

 കോഴിക്കോട് ഡിസിസി പ്രസിഡന്റ് കെ. പ്രവീൺകുമാറും വാർത്താസമ്മേളനത്തിൽ സംബന്ധിച്ചു.ശബരിമല വിഷയത്തിൽ നിന്നും ജനശ്രദ്ധ തിരിക്കാൻ വേണ്ടി നടത്തിയ ആസൂത്രിതമായ നീക്കമായിരുന്നു പേരാമ്പ്രയിൽ പൊലീസിന്റെ നടപടികൾ.

 സർക്കാരിന് പിടിച്ചു നിൽക്കാൻ കഴിയാത്ത കൊള്ളയ്ക്കാണ് ദേവസ്വം ബോർഡിന്റെ അറിവോടെ, അവിടുത്തെ ഉദ്യോഗസ്ഥരും തട്ടിപ്പുകാരും ചേർന്ന് നടത്തിയതെന്ന് ഓരോ ദിവസവും വിവരങ്ങൾ പുറത്തു വന്നുകൊണ്ടിരിക്കുന്നു.

 കട്ടവന്മാർ ദേവസ്വം ബോർഡിലും സർക്കാരിലുമുണ്ട്. കൊള്ളയിൽ പങ്കുപറ്റിയ സർക്കാരാണ് ഇത് എന്നതിനാലാണ് ദേവസ്വം ബോർഡ് പിരിച്ചുവിടാൻ സർക്കാർ മടി കാണിക്കുന്നതിന് പിന്നിലെന്നും ഷാഫി ആരോപിച്ചു.

 വിശ്വാസിയും അവിശ്വാസിയും ഇതു ക്ഷമിക്കില്ലെന്നും ഷാഫി പറമ്പിൽ എംപി പറഞ്ഞു.രാഷ്ട്രീയ നിർദേശത്തെത്തുടർന്ന് പൊലീസ് ബോധപൂർവം ഉണ്ടാക്കിയ സംഘർഷമാണ് പേരാമ്പ്രയിലേതെന്നും ഷാഫി ആരോപിച്ചു.

 ഒരു പ്രകോപനവും ഇല്ലാതെയാണ് പൊലീസ് അതിക്രമം നടത്തിയത്. അവിടെ സംഘർഷം ഒഴിവാക്കാനാണ് തങ്ങൾ ശ്രമിച്ചത്.

 ഡിവൈഎസ്പി ഹരിപ്രസാദ് എന്തിനാണ് ഗ്രനേഡ് കയ്യിൽ വെച്ചതെന്തിനാണെന്ന് ഷാഫി പറമ്പിൽ ചോദിച്ചു. ആശുപത്രിയിൽ എത്തിയപ്പോൾ ഡിവൈഎസ്പി ഹരിപ്രസാദ് ചോദിച്ചത് എംപി ഷാഫി അഡ്മിറ്റായോ എന്നാണെന്ന്, അതിന്റെ വീഡിയോ സഹിതം ഷാഫി പറമ്പിൽ വ്യക്തമാക്കി.