വർക്കലയിൽ ട്രെയിനിൽ ആക്രമണത്തിന് ഇരയായ ശ്രീക്കുട്ടി അപകടനില തരണം ചെയ്തില്ല ;പെൺകുട്ടിയുടെ നില ഗുരുതരമായി തുടരുന്നു

തിരുവനന്തപുരം: വർക്കലയിൽ ട്രെയിനിൽ വെച്ച് ആക്രമണത്തിന് ഇരയായ   പെൺകുട്ടി ഇതുവരെയും അപകടനില  തരണം ചെയ്തിട്ടില്ല.

വീഴ്ചയിൽ തലയ്ക്കും നട്ടെല്ലിനും ​ഗുരുതര പരിക്കേറ്റ ശ്രീക്കുട്ടിയെ  തിരുവനന്തപുരം മെഡിക്കൽ കോളജ് ആശുപത്രി തീവ്ര പരിചരണ വിഭാ​ഗത്തിൽ പ്രവേശിപ്പിച്ചിരിക്കുകയാണ് .

ട്രെയിനിൽ യാത്ര ചെയ്യുകയായിരുന്ന ശ്രീകുട്ടിയെ പനച്ചിമൂട് സ്വദേശിയായ സുരേഷ്‌കുമാർ ആണ് ട്രെയിനിൽ നിന്ന് താഴേക്ക് തള്ളിയിട്ടത് .

ഇയാൾക്കെതിരെ വധശ്രമത്തിന് കേസെടുക്കുകയും  മജിസ്ട്രേറ്റിനു മുന്നിൽ ഹാജരാക്കി റിമാൻഡ് ചെയ്യുകയും ചെയ്തു .

പെൺകുട്ടിയുടെ കൂടെ യാത്ര ചെയ്യുകയായിരുന്ന സുഹൃത്തിനെയും ഇയാൾ ആക്രമിക്കാൻ ശ്രെമിച്ചുവെന്നു ആ പെൺകുട്ടിയും മൊഴി നൽകിയിട്ടുണ്ട് .

 ശ്രീകുട്ടിക്കു മികച്ച ചികിത്സ ലഭിക്കുന്നില്ലെന്നു കുടുംബം ആരോപിച്ചിരുന്നു. എന്നാൽ ഏറ്റവും മികച്ച ചികിത്സ തന്നെ കുട്ടിക്കു നൽകുന്നുണ്ടെന്നു മെഡിക്കൽ കോളജ് സൂപ്രണ്ട് ഡോ. ജയചന്ദ്രൻ വ്യക്തമാക്കി.

 പെൺകുട്ടി അപകടനില തരണം ചെയ്തിട്ടില്ലെന്നും ന്യൂറോ ഉൾപ്പെടെയുള്ള എല്ലാ വിഭാ​ഗങ്ങളും ചേർന്നുള്ള ചികിത്സയാണ് നിലവിൽ നൽകുന്നതെന്നും ഡോ. ജയചന്ദ്രൻ പറഞ്ഞു.

ശ്രീക്കുട്ടിയുടെ തലച്ചോറിനാണ് പരിക്കേറ്റിരിക്കുന്നത്. തലച്ചോറിൽ ചതവുണ്ടെന്നു കണ്ടെത്തി. സർജിക്കൽ ഐസിയുവിലാണ് പെൺകുട്ടി ഇപ്പോഴുള്ളത്.

 വെന്റിലേറ്ററിന്റെ സഹായം ഇപ്പോഴും നൽകുന്നുണ്ടെന്നും ഡോക്ടർ പറയുന്നു. പ്ര​ഗത്ഭരായ ഡോക്ടർമാരുടെ സംഘമാണ് പെൺകുട്ടിയെ ചികിത്സിക്കുന്നതെന്നും സൂപ്രണ്ട് വ്യക്തമാക്കി.