പിഎം ശ്രീ പദ്ധതിയെക്കുറിച്ചു എല്‍ഡിഎഫില്‍ ചര്‍ച്ച ചെയ്യുമെന്നും കരാറിലെ വ്യവസ്ഥകള്‍ എന്തെന്ന് നന്നായി മനസ്സിലാക്കണമെന്നും ടി പി രാമകൃഷ്ണൻ

കോഴിക്കോട്: പിഎം ശ്രീ പദ്ധതിയെ സംബന്ധിച്ച് ഇടതുമുന്നണിയിൽ ചർച്ച ചെയ്യുമെന്ന് എൽഡിഎഫ് കൺവീനർ ടി പി രാമകൃഷ്ണൻ.

 മുന്നണി യോഗത്തിൽ പ്രശ്‌നം ചർച്ചയ്ക്ക് വിധേയമാക്കുകയും നിലപാട് സ്വീകരിക്കുകയും ചെയ്യും. ഒപ്പിട്ടു എന്ന പറയുന്ന വ്യവസ്ഥകൾ എന്താണെന്ന് മനസ്സിലാക്കാതെ അഭിപ്രായ പ്രകടനം നടത്താനാകില്ലെന്നും ഇടതുമുന്നണി കൺവീനർ മാധ്യമങ്ങളോട് പറഞ്ഞു.

അതു മനസ്സിലാക്കി അഭിപ്രായങ്ങൾ പിന്നീട് പറയുക എന്നതുമാത്രമാണ് ഇക്കാര്യത്തിൽ ഇപ്പോൾ ചെയ്യാൻ കഴിയുകയുള്ളൂ.

ദേശീയ വിദ്യാഭ്യാസ നയം ഉയർത്തുന്ന പ്രശ്‌നങ്ങൾ നേരത്തെ ചർച്ചയായിട്ടുള്ളതാണ്. കേന്ദ്രസർക്കാർ നിബന്ധന വെച്ചിരിക്കുന്നതിനാൽ കേരളത്തിന് ലഭിക്കേണ്ട പണം കിട്ടുന്നില്ല.

 കേരളത്തിൽ എസ്എസ്‌കെയുടെ പ്രവർത്തനം പ്രശംസനീയമായിട്ടാണ് പോയിക്കൊണ്ടിരിക്കുന്നത്.

എസ്എസ്‌കെയുടെ പ്രവർത്തനവുമായി ബന്ധപ്പെട്ട് കേന്ദ്രത്തിൽ നിന്നും 1400 കോടി രൂപ ലഭിക്കാനുണ്ട്. ആ പണം ലഭിക്കാൻ വേണ്ടി ചില വ്യവസ്ഥകൾ കേന്ദ്രവും മുന്നോട്ടുവെച്ചിട്ടുണ്ട്. അതിൽ ഏതെല്ലാം കാര്യങ്ങളാണ് അംഗീകരിച്ചതെന്ന് തനിക്ക് അറിയില്ല.

വിദ്യാഭ്യാസമന്ത്രിയുടെ അറിവോടെ ഉദ്യോഗസ്ഥരാണ് കരാറിൽ ഒപ്പിട്ടിട്ടുള്ളത്. അതിന്റെ വ്യവസ്ഥകൾ എന്താണെന്ന് പരിശോധിച്ചശേഷം അഭിപ്രായം പറയാം.

കേരളത്തിന് അർഹതപ്പെട്ട കാശു വാങ്ങിയെടുക്കാൻ പരിശ്രമം നടത്തണം എന്നു ചർച്ച ചെയ്യപ്പെട്ടിട്ടുണ്ട്.

 ബാക്കി ഏതെല്ലാം വ്യവസ്ഥകൾ എന്നതിനേക്കുറിച്ചെല്ലാം വിശദമായി മുന്നണി പോയിട്ടില്ല.

 കരാറിലെ വ്യവസ്ഥകൾ കേരളത്തിന് ഗുണമാണോ ദോഷമാണോ എന്നു മനസ്സിലാക്കിയിട്ടേ പറയാനാകൂ.

 കാര്യങ്ങൾ പരിശോധിക്കാൻ ഞങ്ങൾ തയ്യാറാണെന്നും ടിപി രാമകൃഷ്ണൻ പറഞ്ഞു.