ഉലുവക്ക് അല്‍പം കയപ്പുള്ളതുകൊണ്ട് പലരും അത് കഴിക്കാറില്ല.പക്ഷേ,ഉലുവയില്‍ ധാരാളം പോഷകഗുണങ്ങള്‍ അടങ്ങിയിട്ടുണ്ട്.ആരോഗ്യത്തിനും സൗന്ദര്യത്തിനുമെല്ലാം ഉലുവ ഗുണം ചെയ്യും.ദിവസേന വെറും വയറ്റില്‍ ഒരു ഗ്ലാസ് ഉലുവ വെള്ളം കുടിച്ചാല്‍ ഗുണങ്ങള്‍ ഏറെയാണ്.ഇതില്‍ ഫോളിക് ആസിഡ്, വിറ്റാമിന്‍ എ, വിറ്റാമിന്‍ സി എന്നിവ ധാരാളം അടങ്ങിയിരിക്കുന്നു.

ഉലുവ വെള്ളം കുടിച്ചാലുള്ള മറ്റ് ചില ഗുണങ്ങള്‍ ഇങ്ങനെ:

ഉലുവ വെള്ളം രക്തത്തിലെ പഞ്ചസാരയുടെ അളവ് നിയന്ത്രിക്കാന്‍ സഹായിക്കും. പ്രകൃതിദത്തമായ ലയിക്കുന്ന ഫൈബറായ ഗാലക്ടോമാനന്‍ രക്തത്തിലേക്കുള്ള പഞ്ചസാരയുടെ ആഗിരണം കുറയ്ക്കാന്‍ സഹായിക്കുമെന്ന് പഠനങ്ങള്‍ ചൂണ്ടിക്കാണിക്കുന്നു.

ഇന്‍സുലിന്റെ ഉത്പാദനത്തിന് പ്രേരിപ്പിക്കുന്ന അമിനോ ആസിഡുകളും ഉലുവയില്‍ അടങ്ങിയിട്ടുണ്ട്. ഉലുവ മുളപ്പിച്ചും കഴിക്കാവുന്നതാണ്.അങ്ങനെ കഴിച്ചാല്‍ പോഷകങ്ങള്‍ ഇനിയും കൂടും.

ഉലുവ വെള്ളം കുടിക്കുന്നതിലൂടെ ശരീരത്തിലെ അനാവശ്യ കൊഴുപ്പ് കുറയ്ക്കാന്‍ കഴിയുമെന്ന് 2015ല്‍ ഇന്റര്‍നാഷണല്‍ ജേണല്‍ ഫോര്‍ വിറ്റാമിന്‍ ആന്‍ഡ് ന്യൂട്രീഷന്‍ റിസര്‍ച്ചില്‍ പ്രസിദ്ധീകരിച്ച പഠനത്തില്‍ പറയുന്നുണ്ട്.

കൊളസ്ട്രോള്‍ നിയന്ത്രിക്കാന്‍ ഉലുവ ഫലപ്രദമാണ്.ഉയര്‍ന്ന കൊളസ്‌ട്രോള്‍ ഉള്ളവര്‍ ഉറപ്പായും ഉലുവ വെള്ളം കുടിക്കാന്‍ ശ്രമിക്കുക. ചീത്ത കൊളസ്‌ട്രോള്‍ കുറച്ച് നല്ല കോളസ്‌ട്രോള്‍ ഉദ്പാദനം നിലനിര്‍ത്താന്‍ ഉലുവയ്ക്ക് സാധിക്കും.

ഭക്ഷണത്തിലൂടെയെത്തുന്ന വിഷാശങ്ങളെ പുറന്തള്ളാന്‍ ഉലുവയ്ക്ക് കഴിയും.ഇത് നല്ല ദഹനം നല്‍കുകയും, മലബന്ധം ഒഴിവാക്കുകയും ചെയ്യും. അതിനാല്‍ അസിഡിറ്റി മൂലമുണ്ടാകുന്ന നെഞ്ചെരിച്ചില്‍ തടയാനും ഭക്ഷണത്തില്‍ ഒരു സ്പൂണ്‍ ഉലുവ ചേര്‍ക്കുന്നത് സഹായിക്കും.

വൈറ്റമിന്‍ കെ, വൈറ്റമിന്‍ സി എന്നിവ അടങ്ങിയ ഉലുവ ചര്‍മത്തിലെ തിണര്‍പ്പുകളും കറുത്ത പാടുകളും മാറാന്‍ സഹായിക്കും. ശരീരത്തിലെ വിഷാംശം നീക്കി ദഹനത്തെ സഹായിക്കുന്ന ഉലുവ ചര്‍മത്തിന്റെയും ആരോഗ്യം സംരക്ഷിക്കുന്നു.