ചങ്ങനാശേരി: അന്തരിച്ച ചങ്ങനാശേരി അതിരൂപത മുന്‍ ആര്‍ച്ച് ബിഷപ്പ് മാര്‍ ജോസഫ് പൗവത്തിലിന്റെ സംസ്‌കാരം ഇന്ന്. ചങ്ങനാശേരി വലിയ പള്ളിയില്‍ രാവിലെ 9 മണിയോടെ ശുശ്രൂഷകള്‍ തുടങ്ങും.

സര്‍ക്കാരിന്റെ ഔദ്യോഗിക ബഹുമതികളോടെയാണ് സംസ്‌കാരം.കഴിഞ്ഞ 18നാണ് വാര്‍ധക്യസഹജമായ അസുഖത്തെ തുടര്‍ന്ന് മാര്‍ ജോസഫ് പൗവ്വത്തില്‍ അന്തരിച്ചത്.

ഇന്നലെ ചങ്ങനാശേരി അതിരൂപത ആസ്ഥാനത്ത് പൊതുദര്‍ശനത്തിന് വച്ചശേഷം വിലാപയാത്രയായാണ് മൃതദേഹം വലിയ പള്ളിയിലേക്ക് കൊണ്ടുവന്നത്.

സാമൂഹ്യ സാംസ്‌കാരിക രാഷ്ട്രീയ രംഗത്തെ പ്രമുഖര്‍ അന്തിമോപചാരമര്‍പ്പിക്കാനെത്തിയിരുന്നു.സഭയുടെ പ്രധാനപ്പെട്ട അധ്യക്ഷനായിരുന്നു മാര്‍ ജോസഫ് പൗവത്തില്‍.

1930 ഓഗസ്റ്റ് 14ന് കുറുമ്പനാട്ടാണ് ജനനം. എസ്.ബി കോളജില്‍നിന്ന് വിദ്യാഭ്യാസം നേടിയ ശേഷം 1962ല്‍ പൗരോഹിത്യം സ്വീകരിച്ചു. അതിനുശേഷം എസ്.ബി കോളജില്‍തന്നെ കുറച്ചുകാലം അധ്യാപകനായി സേവനമനുഷ്ഠിച്ചു. പിന്നീട് ഇംഗ്ലണ്ടില്‍നിന്ന് ഉന്നത വിദ്യാഭ്യാസം നേടി. 1972ല്‍ കാഞ്ഞിരപ്പള്ളി അതിരൂപതാ മെത്രാനായി സ്ഥാനമേറ്റു.