കുറ്റവാളികള്‍ക്കെതിരെ പൊലീസ് നടപടിയെടുക്കാത്തതില്‍ പ്രതിഷേധിച്ച് കൂട്ട ബലത്സംഗ അതിജീവിതയുടെ പിതാവ് ആത്മഹത്യ ചെയ്തു. ഉത്തര്‍ പ്രദേശിലെ ജലൗനിലാണ് സംഭവം. പരാതിപ്പെടാനെത്തിയപ്പോള്‍ പൊലീസ് ഭീഷണിപ്പെടുത്തിയെന്നും കേസെടുത്തില്ലെന്നും ആരോപിച്ചാണ് പ്രായപൂര്‍ത്തിയാവാത്ത പെണ്‍കുട്ടിയുടെ പിതാവ് തിങ്കളാഴ്ച ആത്മഹത്യ ചെയ്തത്.

രണ്ട് മാസങ്ങള്‍ക്ക് മുന്‍പാണ് ഇദ്ദേഹത്തിന്റെ മകള്‍ കൂട്ട ബലാത്സംഗത്തിനിരയായത്. ഗ്രാമത്തിലെ തന്നെ ചില യുവാക്കള്‍ ചേര്‍ന്നാണ് കുട്ടിയെ ബലാത്സംഗം ചെയ്തത്. പൊലീസില്‍ പരാതിപ്പെട്ടാല്‍ കൊന്നുകളയുമെന്ന് ഇവര്‍ കുട്ടിയെ ഭീഷണിപ്പെടുത്തുകയും ചെയ്തു. പഞ്ചാബില്‍ ജോലി ചെയ്യുകയായിരുന്ന പിതാവ് തിരികെവന്നപ്പോള്‍ കുട്ടി കാര്യങ്ങള്‍ വിവരിച്ചു. സ്‌റ്റേഷനില്‍ പരാതി നല്‍കാനെത്തിയപ്പോള്‍ പൊലീസ് ഭീഷണിപ്പെടുത്തി. മറ്റൊരു കേസില്‍ പെടുത്തി ഇദ്ദേഹത്തെ അകത്തിടുമെന്ന് പൊലീസ് ഭീഷണിപ്പെടുത്തിയെന്നായിരുന്നു വെളിപ്പെടുത്തല്‍. മാസങ്ങളോളം കേസെടുക്കാതിരുന്നതിനെ തുടര്‍ന്ന് കുട്ടിയുടെ പിതാവ് ആത്മഹത്യ ചെയ്യുകയായിരുന്നു.

മരണത്തിനു പിന്നാലെ നാട്ടുകാരും ബന്ധുക്കളും ചേര്‍ന്ന് പ്രതിഷേധിച്ചതോടെ കൃത്യനിര്‍വഹണം നടത്താത്ത പൊലീസുകാര്‍ക്കെതിരെ നടപടിയെടുക്കുമെന്ന് അധികൃതര്‍ അറിയിച്ചു.