ഡല്‍ഹി: 2006-ല്‍ കാണാതായ യുവതിയെ കണ്ടെത്തി ദില്ലി പൊലീസ്. യുവതിയെ തട്ടിക്കൊണ്ടുപോയെന്ന പരാതിയുടെ അടിസ്ഥാനത്തിലുള്ള അന്വേഷണത്തിനൊടുവിലാണ് 17 വര്‍ഷങ്ങള്‍ക്കിപ്പുറം 32-ാം വയസില്‍ യുവതിയെ കണ്ടെത്തിയത്. ഡല്‍ഹിയിലെ വാടക മുറിയില്‍ താമസിക്കുന്ന ഇവരെ ന്യൂഡല്‍ഹിയിലെ ഗോകല്‍പുരിയില്‍ നിന്നാണ് കണ്ടെത്തിയത്.

മെയ് 22 നാണ് സീമാപുരി പൊലീസ് സ്റ്റേഷനില്‍ ഒരു രഹസ്യ വിവരം ലഭിക്കുന്നത്. തുടര്‍ന്ന് നടത്തിയ പരിശോധനയില്‍ 17 വര്‍ഷം മുമ്പ് തട്ടിക്കൊണ്ടുപോയെന്ന് പരാതി ലഭിച്ച ഇന്ന് 32 വയസുള്ള യുവതിയെ കണ്ടത്തുകയായിരുന്നുവെന്ന് ഡിസിപി ഷഹ്ദര രോഹിത് മീണ പറഞ്ഞതായി റിപ്പോര്‍ട്ടില്‍ പറയുന്നു.

പെണ്‍കുട്ടിയുടെ മാതാപിതാക്കളുടെ പരാതിയെ തുടര്‍ന്ന് 2006ല്‍ ഗോകുല്‍പുരി പൊലീസ് സ്റ്റേഷനില്‍ പൊലീസ് കേസ് രജിസ്റ്റര്‍ ചെയ്തിരുന്നു. 2006-ലാണ് പെണ്‍കുട്ടിയെ തട്ടിക്കൊണ്ടുപോയത്. വീട്ടില്‍ നിന്ന് പോയ ശേഷം പെണ്‍കുട്ടി യുപിയില്‍ ദീപക് എന്നയാളോടൊപ്പം താമസിച്ചുവരികയായിരുന്നു എന്ന് പൊലീസ് കണ്ടെത്തി.

ഒടുവില്‍ ഇയാളുമായി തെറ്റിപ്പിരിഞ്ഞ് ലോക്ക്‌ഡൌണ്‍ കാലത്താണ് ഡല്‍ഹിയിലെ ഗോകല്‍പുരിയില്‍ താമസിക്കാന്‍ തുടങ്ങിയത്. ഇക്കാര്യങ്ങള്‍ പെണ്‍കുട്ടി വെളിപ്പെടുത്തിയതായി പൊലീസ് അറിയിച്ചു. മാത്രമല്ല, ഡല്‍ഹിയില്‍ നിന്ന് തട്ടിക്കൊണ്ടുപോകപ്പെട്ട 116 കൂട്ടികളടക്കം 301 -ഓളം പേരെ ഷഹ്ദാര ജില്ലയില്‍ നിന്ന് മാത്രം കണ്ടെടുത്തതായി ഡിസിപി ഷഹ്ദര രോഹിത് മീണയെ ഉദ്ധരിച്ച് എന്‍ഡിടിവി റിപ്പോര്‍ട്ട് ചെയ്യുന്നു.