പുതുക്കിയ ഇന്ധനവില ഇന്നു മുതല്‍ പ്രാബല്യത്തില്‍ വരും. കേന്ദ്രസര്‍ക്കാര്‍ എക്സൈസ് തീരുവ കുറച്ചതോടെ സംസ്ഥാനത്തും ഇന്ധനവില കുറയും. സംസ്ഥാനത്തെ പെട്രോള്‍ നികുതി 2.41 രൂപയും ഡീസല്‍ നികുതി 1.30 രൂപയുമാണ് കുറയുകയെന്ന് ധനമന്ത്രി കെ എന്‍ ബാലഗോപാല്‍ പറഞ്ഞു.സംസ്ഥാനത്ത് ഇതോടെ പെട്രോള്‍ ലിറ്ററിന് 10.40 രൂപയും ഡീസലിന് 7.35 രൂപയും കുറയും.

ശക്തമായ പ്രതിഷേധങ്ങള്‍ക്കൊടുവിലാണ് രാജ്യത്ത് ഇന്ധനവില കുറച്ചത്. പെട്രോള്‍ ലിറ്ററിന് 9.50 രൂപയും ഡീസലിന് 7 രൂപയുമാണ് കുറക്കുന്നതെന്ന് കേന്ദ്രമന്ത്രി നിര്‍മ്മല സീതാരാമനാണ് അറിയിച്ചു.

പണപ്പെരുപ്പം രൂക്ഷമായതോടെയാണ് കേന്ദ്ര സര്‍ക്കാര്‍ ഇന്ധന വില കുറയ്ക്കാന്‍ നിര്‍ബന്ധിതരായത്. ഇന്ധനവില കൂടുന്നതുകൊണ്ട് ഭക്ഷ്യവസ്തുക്കളുടെ വില കുത്തനെ ഉയരുന്ന സാഹചര്യമാണുള്ളത്. പാല്‍, പച്ചക്കറി എന്നിവയുടെ വില ഉയരുന്നുണ്ട്.ഇതിന്റെ കൂടി അടിസ്ഥാനത്തിലാണ് ഇന്ധനവില കുറയ്ക്കുന്നത്.

പാചകവാതക സിലിണ്ടറിന് 200 രൂപ സബ്സിഡിയും പ്രഖ്യാപിച്ചിരുന്നു. വര്‍ഷം 12 സിലിണ്ടറുകള്‍ക്കാണ് സബ്സിഡി പ്രഖ്യാപിച്ചത്. അര്‍ത്ഥരാത്രി മുതല്‍ പുതുക്കിയ നിരക്ക് പ്രാബല്യത്തില്‍ വരും. പ്ലാസ്റ്റിക് ഉല്‍പ്പന്നങ്ങളുടെ അസംസ്‌കൃത വസ്തുക്കള്‍ക്കുള്ള കസ്റ്റംസ് തീരുവയിലും കുറവുവരും. സ്റ്റീല്‍ ഉല്‍പ്പന്നങ്ങള്‍ക്കുള്ള അസംസ്‌കൃത വസ്തുക്കള്‍ക്കുള്ള ഇറക്കുമതി തീരുവയും കുറയുമെന്നാണ് വിവരം.