കരൂര്‍ ദുരന്തത്തില്‍ മരിച്ചവരുടെ കുടുംബങ്ങളോട് മാപ്പ് ചോദിച്ച് നടന്‍ വിജയ്.

ചെന്നൈ: കരൂർ ദുരന്തത്തിൽ മരിച്ചവരുടെ കുടുംബങ്ങളോട്  കാലിൽ തൊട്ട് മാപ്പ്ചോദിച്ച് നടൻ വിജയ്. വിജയ് കരൂരിൽ എത്താത്തതിനും ക്ഷമ ചോദിച്ചുവെന്ന് കൂടിക്കാഴ്ചയിൽ പങ്കെടുത്ത കുടുംബങ്ങൾ പറഞ്ഞു.

 41 പേർ മരിച്ച അപകടം നടന്ന് ഒരുമാസത്തിന് ശേഷമാണ് മരിച്ചവരുടെ 33 കുടുംബങ്ങളുമായി വിജയ് കൂടിക്കാഴ്ച നടത്തിയത്.

 കരൂർ സന്ദർശിക്കാനുള്ള നീക്കങ്ങൾ പരാജയപ്പെട്ടതോടെയാണ് മഹാബലിപുരത്തെ ഹോട്ടലിലാണു കൂടിക്കാഴ്ചയൊരുക്കിയത്.

സർക്കാരിന്റെ അനുമതി ലഭിക്കാത്തതിനാലാണ് കരൂർ സന്ദർശിക്കാൻ കഴിയാതിരുന്നതെന്നും ഇവിടെ എത്താൻ കഴിയാതിരുന്നതിൽ താരം ക്ഷമ ചോദിച്ചതായും ചടങ്ങിൽ പങ്കെടുത്തവർ വ്യക്തമാക്കി.

160ലേറെപ്പേർ ചടങ്ങിനെത്തിയിരുന്നു. രാവിലെ 9 മണിക്ക് തുടങ്ങിയ കൂടിക്കാഴ്ച വൈകുന്നേരം 6.30 വരെ നീണ്ടുനിന്നു.

 ദുരിതത്തിലായ പല കുടുംബങ്ങളും തങ്ങളുടെ ദുഃഖം പങ്കുവെച്ച് വിതുമ്പിയതോടെ ആശ്വാസവാക്കുകൾ പറയാനാവാതെ വിജയും അവരെ ചേർത്തുനിർത്തി.

കരൂരിൽ സുരക്ഷാ പ്രശ്‌നങ്ങളുള്ളതിനാലും അവിടെയാണെങ്കിൽ നിശ്ചിത സമയത്തിനുള്ളിൽ പരിപാടി അവസാനിപ്പിക്കേണ്ടിവരുമെന്നതിനാലുമാണ് കരൂരിൽ സംഘടിപ്പിക്കാതെ മഹാബലിപുരത്തെ സ്വകാര്യ ഹോട്ടലിൽ പരിപാടി സംഘടിപ്പിച്ചതെന്ന് ടിവികെ നേതാവ് അരുൺ രാജ് പറഞ്ഞു.

 മരിച്ചവരുടെ കുടുംബങ്ങളുമായി കൂടുതൽ സമയം ചെലവിടണമെന്നതിനാലുമാണ് പരിപാടി ഇത്തരത്തിൽ ക്രമീകരിച്ചതെന്ന് അദ്ദേഹം കൂട്ടിച്ചേർത്തു.വളരെയധികം അതി ദാരുണവും ആകസ്മികവുമായ അപകടം ആയിരുന്നു കരൂരിൽ സംഭവിച്ചത് .

ഈ സംഭവത്തിന് ശേഷം വിജയ് വളരെയധികം മാനസിക പ്രയാസങ്ങൾ നേരിട്ടുകൊണ്ടിരിക്കുകയായിരുന്നു .

വളരെ നാളുകൾക്ക് ശേഷമാണു വിജയി മരിച്ചവരുടെ ആശ്രിതരെ കാണാനായി എത്തിയത് .