നീരജ് ചോപ്രയെ ലെഫ്റ്റനന്റ് കേണല്‍ ആയി ആദരിച്ച് സൈന്യം

ന്യൂഡൽഹി: ജാവലിൻ ത്രോ താരവും ഒളിംപിക് സ്വർണ മെഡൽ ജേതാവുമായ നീരജ് ചോപ്രയെ ഓണററി ലെഫ്റ്റനന്റ് കേണൽ പദവി നൽകി ആദരിച്ചു ഇന്ത്യൻ സൈന്യം.  ഡൽഹിയിൽ നടന്ന ചടങ്ങിൽ പ്രതിരോധമന്ത്രി രാജ്നാഥ് സിങ്ങും കരസേനാ മേധാവി ജനറൽ ഉപേന്ദ്ര ദ്വിവേദിയും ചേർന്നാണ്  ബഹുമതി കൈമാറിയത് .

 കായികമേഖലയിൽ നൽകിയ സംഭാവനകൾ പരിഗണിച്ചാണ് നീരജിന് ടെറിട്ടോറിയൽ ആർമിയിൽ ഓണററി ലെഫ്റ്റനന്റ് കേണൽ പദവി നൽകിയത്.

സ്ഥിരോത്സാഹത്തിന്റെയും രാജ്യസ്നേഹത്തിന്റെയും പ്രതീകമാണ് നീരജ് ചോപ്രയെന്ന് കേന്ദ്ര പ്രതിരോധമന്ത്രി രാജ്നാഥ് സിങ് പറഞ്ഞു.

ചടങ്ങിന് സാക്ഷ്യം വഹിക്കാൻ നീരജിന്റെ കുടുംബവും സന്നിഹിതരായിരുന്നു. 2016 ഓഗസ്റ്റ് 26ന് നായിബ് സുബേദാർ റാങ്കിലാണ് നീരജ് സൈന്യത്തിൽ ജൂനിയർ കമ്മിഷൻഡ് ഓഫീസറായി ചേർന്നത്.

 2024 ൽ സുബേദാർ മേജർ പദവിയിലേക്ക് സ്ഥാനക്കയറ്റം ലഭിച്ചിരുന്നു.കായിക മേഖലയിലെ നേട്ടങ്ങൾക്ക് അംഗീകാരമായി രാജ്യം ഖേൽ രത്ന, പദ്മശ്രീ പുരസ്‌കാരങ്ങൾ നൽകി നീരജ് ചോപ്രയെ ആദരിച്ചിരുന്നു.

 2020ലെ ടോക്യോ ഒളിംപിക്സിൽ സ്വർണം നേടിയതിന് പിന്നാലെ 2022 ജനുവരിയിൽ രജ്പുത്താന റൈഫിൾസ് നീരജിന് പരം വിശിഷ്ട സേവ മെഡലും സമ്മാനിച്ചിരുന്നു. 2018 ൽ അർജുന അവാർഡും ലഭിച്ചിട്ടുണ്ട്.