കരൂരിലെത്തി കാണാമെന്ന വാക്ക് പാലിക്കാത്തതിനെത്തുടർന്ന് വിജയ് നല്‍കിയ 20 ലക്ഷം തിരികെ നല്‍കി മരിച്ചയാളുടെ ഭാര്യ

ചെന്നൈ: കരൂർദുരന്തത്തിൽ മരിച്ചവരുടെ ആശ്രിതർക്ക്   തമിഴക വെട്രി കഴകം നേതാവ് വിജയ് നൽകിയ 20 ലക്ഷം രൂപ തിരിച്ചു നൽകി വീട്ടമ്മ.

കരൂരിൽ റാലിക്കിടെ മരിച്ച രമേശിന്റെ ഭാര്യ സംഗവിയാണ് പണം തിരികെ നൽകിയത്.

 റാലിയ്ക്കിടെ കൊല്ലപ്പെട്ടവരുടെ ബന്ധുക്കളെ കരൂരിലെത്തി കാണും എന്ന വാഗാദാനം വിജയ് പാലിച്ചില്ലെന്ന് ആരോപിച്ചാണ് വീട്ടമ്മയുടെ നടപടി.

 തനിക്ക് ലഭിച്ച പണം ടിവികെയുടെ അക്കൗണ്ടിലേക്ക് സംഗവി ട്രാൻസ്ഫർ ചെയ്‌തെന്നാണ് വിവരം.

കരൂർ ദുരന്തത്തിൽ കൊല്ലപ്പെട്ടവരുടെ കുടുംബങ്ങളുമായി വിജയ് മഹാബലിപുരത്ത് നടത്തിയ കൂടിക്കാഴ്ചയ്ക്ക് പിന്നാലെയാണ് സംഗവിയുടെ നടപടി.

 രണ്ടാഴ്ച മുമ്പ് വിജയ് വീഡിയോ കോളിലൂടെ ഞങ്ങളോട് സംസാരിച്ചു, ഞങ്ങളെ കാണാനും അനുശോചനം അറിയിക്കാനും ഇവിടെ വരുമെന്ന് അറിയിച്ചിരുന്നു.

 ഇതുണ്ടാകാത്ത സാഹചര്യത്തിലാണ് പണം തിരികെ നൽകുന്നത്.

പണത്തെക്കാൾ വലുതാണ് അദ്ദേഹം നേരിട്ട് സന്ദർശിച്ചുള്ള സാന്ത്വനമെന്നും സംഗവി പറഞ്ഞു.

തിങ്കളാഴ്ച മഹാബലിപുരത്തുനടന്ന വിജയ്യുടെ കൂടിക്കാഴ്ചയ്ക്കുതന്നെ വിളിച്ചില്ലെന്നും സംഗവി അറിയിച്ചു.

അതേസമയം, സംഗവിയുടെ ഭർതൃസഹോദരി ഭൂപതിയും ബന്ധുക്കളും മഹാബലിപുരത്തേക്ക് വന്നിരുന്നതായും റിപ്പോർട്ടുകൾ പറയുന്നു.

തങ്ങളുമായി ബന്ധമില്ലാത്ത സഹോദരിയെയാണ് ടിവികെ നേതാക്കൾ മഹാബലിപുരത്തേക്ക് കൊണ്ടുപോയതെന്നും സംഗവി പറയുന്നു.

തിങ്കളാഴ്ച കരൂർ ദുരന്തത്തിൽ മരിച്ചവരുടെ കുടുംബങ്ങളെ നേരിൽക്കണ്ട വിജയ് സംഭവങ്ങളിൽ മാപ്പ് പറഞ്ഞതായി ബന്ധുക്കൾ വെളിപ്പെടുത്തിയിരുന്നു.

 സർക്കാരിന്റെ അനുമതി ലഭിക്കാത്തതിനാലാണ് കരൂർ സന്ദർശിക്കാൻ കഴിയാതിരുന്നതെന്നും ഇവിടെ എത്താൻ കഴിയാതിരുന്നതിൽ താരം ക്ഷമ ചോദിച്ചതായും ചടങ്ങിൽ പങ്കെടുത്തവർ വ്യക്തമാക്കി.

 41 പേർ മരിച്ച അപകടം നടന്ന് ഒരുമാസത്തിന് ശേഷമാണ് മരിച്ചവരുടെ 33 കുടുംബങ്ങളുമായി വിജയ് കൂടിക്കാഴ്ച നടത്തിയത്.

കരൂർ സന്ദർശിക്കാനുള്ള നീക്കങ്ങൾ പരാജയപ്പെട്ടതോടെയാണ് മഹാബലിപുരത്തെ ഹോട്ടലിലാണു കൂടിക്കാഴ്ചയൊരുക്കിയത്.

160ലേറെപ്പേർ ചടങ്ങിനെത്തിയിരുന്നു.