തമിഴ്‌നാടിനെ മുക്കി കനത്ത മഴ; മേട്ടൂര്‍ അണക്കെട്ട് പൂര്‍ണ്ണ ശേഷിയില്‍; കടലൂരില്‍ മാത്രം 191 ദുരിതാശ്വാസ ക്യാമ്പുകള്‍

ചെന്നൈ : തമിഴ്നാട്ടില്‍ തുടര്‍ച്ചയായി പെയ്യുന്ന കനത്ത മഴയെ തുടര്‍ന്ന് ദുരിതത്തിലായി ജനജീവിതം. വിവിധ ജലസംഭരണികളിലെ ജലനിരപ്പ് കുത്തനെ ഉയര്‍ന്നു. സംസ്ഥാനത്തെ ഏറ്റവും വലിയ ജലസംഭരണിയായ മേട്ടൂര്‍ അണക്കെട്ട് പൂര്‍ണ്ണ ശേഷിയിലെത്തി.

രാത്രിയില്‍ പെയ്ത കനത്ത മഴയ്ക്ക് പിന്നാലെ ജലനിരപ്പ് നിയന്ത്രിക്കുന്നതിനും വെള്ളപ്പൊക്ക സാധ്യത തടയുന്നതിനുമായി ചെന്നൈയിലെ രണ്ട് പ്രധാന ജലസംഭരണികളായ ചെമ്പരമ്പാക്കത്തിലെയും പൂണ്ടിയിലെയും ഷട്ടറുകള്‍ തുറന്നു. ചെന്നൈയില്‍ ഇടയ്ക്കിടെ പെയ്ത കനത്ത മഴയ്ക്ക് പുറമേ തീരദേശ ജില്ലകളിലും വ്യാപകമായ മഴ പെയ്തു.

ബംഗാള്‍ ഉള്‍ക്കടലില്‍ രൂപം കൊണ്ട ന്യൂനമര്‍ദ്ദം ആഴത്തിലുള്ള ന്യൂനമര്‍ദ്ദമായി മാറുന്നതിനാല്‍ തമിഴ്നാടിന്റെ വിവിധ ഭാഗങ്ങളില്‍ ഐഎംഡി റെഡ് അലേര്‍ട്ട് പ്രഖ്യാപിച്ചു. തുടര്‍ച്ചയായ കനത്ത മഴ മൂലമുണ്ടാകുന്ന ഏത് സാഹചര്യവും നേരിടാന്‍ പൂര്‍ണ്ണമായും സജ്ജരായിരിക്കാന്‍ വിവിധ ജില്ലാ ഭരണകൂടങ്ങള്‍ ജനങ്ങള്‍ക്ക് മുന്നറിയിപ്പ് നല്‍കിയിട്ടുണ്ട്. കനത്ത മഴയ്ക്ക് സാധ്യതയുള്ളതിനാല്‍ ബുധനാഴ്ച വരെ കടലൂര്‍ ജില്ലയിലുടനീളം 191 താല്‍ക്കാലിക ദുരിതാശ്വാസ ക്യാമ്പുകള്‍ തുറന്നിട്ടുണ്ട്.