ഇന്ത്യൻ റെയിൽവേ എസി കോച്ചുകളിലെ കമ്പിളിപ്പുതപ്പുകളുടെ ശുചിത്വ പ്രശ്നത്തിന് പരിഹാരം കാണുന്നു .

ന്യൂഡൽഹി: എസി കോച്ചുകളിൽ യാത്ര ചെയ്യുന്നവരുടെയെല്ലാം ദീർഘകാലമായുള്ള ഒരു പരാതി അവസാനിപ്പിക്കാൻ ഇന്ത്യൻ റെയിൽവേ തയ്യാറെടുക്കുന്നു. കമ്പിളിപ്പുതപ്പുകൾ കഴുകാതെ ദീർഘകാലം ഉപയോഗിക്കുന്ന പ്രശ്നത്തിനാണ് പരിഹാരമാകുന്നത്.

 കമ്പിളികൾ കഴുകുക എന്നതല്ല പരിഹാരം, പകരം എല്ലാ കമ്പിളികൾക്കും ഒരു കവർ (ബ്ലാങ്കറ്റ് കവർ) നൽകുക എന്നതാണ്. കോട്ടൺ തുണിയിലുള്ള ഈ കവർ നന്നായി കഴുകിയാണ് യാത്രക്കാർക്ക് നൽകുക. കമ്പിളിപ്പുതപ്പുകൾ കഴുകി ഉണക്കുന്നത് പ്രായോഗികമായി ഏറെക്കുറെ അസാധ്യമായ കാര്യമാണ് റെയിൽവേയെ സംബന്ധിച്ച്. എന്നാൽ കമ്പിളിക്കവറുകൾ കഴുകി ഉണക്കിയെടുക്കാൻ പ്രയാസമുണ്ടാകില്ല.

റെയിൽവേ മന്ത്രിയുടെ സാന്നിധ്യത്തിൽ ജയ്പൂർ-അസാർവ എക്സ്പ്രസിൽ ഈ പുതിയ സംവിധാനം പരീക്ഷണാടിസ്ഥാനത്തിൽ ആരംഭിച്ചു. എല്ലാ എസി ക്ലാസുകളിലും ബ്ലാങ്കറ്റ് കവറുകൾ നൽകിത്തുടങ്ങിയിട്ടുണ്ട്. ഇത് യാത്രകൾ കുറെക്കൂടി മെച്ചപ്പെട്ടതാക്കി മാറ്റുമെന്ന് റെയിൽവേ അധികൃതർ അറിയിച്ചു.