30 ലിറ്റർ മുലപ്പാൽ ദാനം ചെയ്ത് ജ്വാല; അഭിനന്ദിച്ച് സോഷ്യൽ മീഡിയ

കഴിഞ്ഞ ഏപ്രിലിലാണ് തമിഴ് നടനും നിർമ്മാതാവുമായ വിഷ്ണു വിശാലിനും ബാഡ്മിന്റൺ താരം ജ്വാല ഗുട്ടയ്ക്കും കുഞ്ഞ് പിറന്നത്. ഇപ്പോഴിതാ മുലപ്പാൽ ദാനം ചെയ്ത് വാർത്തകളിൽ നിറയുകയാണ് ജ്വാല. ഒരു സർക്കാർ ആശുപത്രിയിലെ മുലപ്പാൽ ദാന കാമ്പെയ്‌ന്റെ ഭാഗമായാണ് ജ്വാല മാതൃകയായിരിക്കുന്നത്.കഴിഞ്ഞ നാല് മാസമായി ജ്വാല സ്ഥിരമായി മുലപ്പാൽ ദാനം ചെയ്യുന്നുണ്ട്. ഇതുവരെ 30 ലിറ്റർ മുലപ്പാലാണ് ജ്വാല നൽകിയെന്നും റിപ്പോർട്ടുകൾ പറയുന്നു. അമ്മമാരില്ലാത്ത കുഞ്ഞുങ്ങളെയും ആശുപത്രിയിൽ കഴിയുന്ന മാസം തികയാതെ ജനിച്ചതോ ഗുരുതരാവസ്ഥയിലുള്ളതോ ആയ കുഞ്ഞുങ്ങളെയും സഹായിക്കുക എന്നതാണ് ഈ സംരംഭത്തിന്റെ ലക്ഷ്യം.

ഈ കാമ്പെയ്‌നെ കുറിച്ച് ഓഗസ്റ്റിൽ ജ്വാല എക്‌സിൽ ഒരു കുറിപ്പ് പങ്കുവെച്ചിരുന്നു. 'മുലപ്പാൽ ജീവൻ രക്ഷിക്കുന്നു. മാസം തികയാതെയും അസുഖബാധിതരായും ജനിക്കുന്ന കുഞ്ഞുങ്ങൾക്ക്, ദാനം ചെയ്യുന്ന മുലപ്പാൽ അവരുടെ ജീവിതത്തിൽ വലിയ മാറ്റങ്ങൾക്ക് കാരണമാകും. നിങ്ങൾക്ക് ദാനം ചെയ്യാൻ കഴിയുമെങ്കിൽ, സഹായം ആവശ്യമുള്ള ഒരു കുടുംബത്തിന് നിങ്ങളൊരു ഹീറോ ആകും. ഇതിനെക്കുറിച്ച് കൂടുതൽ അറിയുക, ഈ സന്ദേശം പങ്കുവെക്കുക, മിൽക്ക് ബാങ്കുകളെ പിന്തുണയ്ക്കുക'- എന്നാണ് ജ്വാല കുറിച്ചത്. നിരവധി പേരാണ് ജ്വാലയെ പ്രശംസിച്ചുകൊണ്ട് രംഗത്തെത്തിയത്.