അഴിമതി അന്വേഷിക്കുന്ന ലോക്പാലിന് 5 കോടി ചെലവിൽ ബിഎംഡബ്ല്യുവിന്റെ ആഡംബര കാറുകൾ വാങ്ങുന്നു

ന്യൂഡൽഹി: പൊതുപ്രവർത്തകർക്കെതിരായ അഴിമതി ആരോപണങ്ങൾ അന്വേഷിക്കുന്ന ലോക്പാലിനായി ആഡംബര കാറുകൾ വാങ്ങുന്നു. എഴുപത് ലക്ഷം വിലയുള്ള ബിഎംഡബ്ല്യു 3 സീരീസ് 330-ൽ പെട്ട ഏഴ് കാറുകൾ വാങ്ങാനാണ് തീരുമാനം.

 ഇതിനുള്ള ടെണ്ടർ നടപടികൾ ആരംഭിച്ചു. ഏഴ് വാഹനങ്ങൾ വാങ്ങുന്നതിനായി അഞ്ച് കോടി രൂപ ചെലവ് വരുമെന്നാണ് കണക്കാക്കിയിട്ടുള്ളത്.ലോക്പാൽ ചെയർപേഴ്‌സണിന്റെയും അംഗങ്ങളുടെയും ഉപയോഗത്തിനാണ് ഏഴ് ആഡംബര കാറുകൾ വാങ്ങുന്നത്.

 ചെയർപേഴ്‌സണ് പുറമെ ആറ് അംഗങ്ങളാണ് ലോക്പാലിൽ ഉള്ളത്. ഇതിൽ മൂന്ന് പേർ ജുഡീഷ്യൽ അംഗങ്ങളാണ്. സുപ്രീം കോടതിയിൽനിന്ന് വിരമിച്ച ജസ്റ്റിസ് എ എം ഖാൻവിൽക്കറാണ് ( അജയ് മാണിക് റാവു ഖാൻവിൽക്കർ) നിലവിൽ ലോക്പാൽ ചെയർപേഴ്‌സൺ.ഈ കാറിന്റെ ഓൺ-റോഡ് വില ഏകദേശം 70 ലക്ഷം രൂപയാണ്.

വാഹനം നൽകുന്ന സ്ഥാപനം ലോക്പാലിലെ ഡ്രൈവർമാർക്ക് സമഗ്രമായ പരിശീലനം നൽകണമെന്നും ടെണ്ടർ വ്യവസ്ഥയിൽ ചൂണ്ടിക്കാട്ടിയിട്ടുണ്ട്. ലോക്പാൽ ഓഫ് ഇന്ത്യ, 2013-ലെ ലോക്പാൽ, ലോകായുക്ത നിയമപ്രകാരം സ്ഥാപിതമായ സ്ഥാപനമാണ്.