ദൂര്‍ഗാഷ്ടമി, അറിയേണ്ടതെല്ലാം

നവരാത്രി ആഘോഷങ്ങളിലെ അതിപ്രധാനമായ ദിവസമാണ് ദുര്‍ഗാഷ്ടമി. ഒമ്പത് രാത്രികളിലായി ദുര്‍ഗാദേവിയുടെ വിവിധ ഭാവങ്ങളെ ആരാധിക്കുമ്പോള്‍, എട്ടാം ദിനമായ ദുര്‍ഗാഷ്ടമിക്ക് കേരളത്തില്‍ സവിശേഷ സ്ഥാനമുണ്ട്. ദേവിയുടെ എട്ടാമത്തെ രൂപമായ മഹാഗൗരിയെയാണ് ഈ ദിവസം ആരാധിക്കുന്നത്. ശുദ്ധിയും ശാന്തതയും ഐശ്വര്യവുമാണ് ഈ ദേവീ ഭാവം പ്രതിനിധീകരിക്കുന്നത്.

പ്രാധാന്യം

അശ്വിന മാസത്തിലെ ശുക്ലപക്ഷത്തിലെ അഷ്ടമി തിഥിയിലാണ് ദുര്‍ഗാഷ്ടമി വരുന്നത്. 2025-ല്‍ സെപ്റ്റംബര്‍ 30നാണ് ദുര്‍ഗ്ഗാഷ്ടമി. 2025 സെപ്റ്റംബര്‍ 29 ന് വൈകുന്നേരം 04:31 ന് അഷ്ടമി തിഥി ആരംഭിച്ച് 2025 സെപ്റ്റംബര്‍ 30 ന് വൈകുന്നേരം 06:06 ന് അവസാനിക്കും. ഈ ദിവസം ദുര്‍ഗാദേവി മഹിഷാസുരനുമായി യുദ്ധം ചെയ്തതിന്റെ പാരമ്യത്തെ സൂചിപ്പിക്കുന്നു. എന്നാല്‍ കേരളത്തില്‍ ഈ ദിനം സരസ്വതി പൂജയുടെ ആരംഭമായിട്ടാണ് ആഘോഷിക്കുന്നത്. അജ്ഞാനത്തെ അകറ്റി അറിവിന്റെ വെളിച്ചം പകരുന്ന ദേവതയായ സരസ്വതിയെ ഈ ദിവസം വിശേഷാല്‍ പൂജിക്കുന്നു.

പൂജവയ്പ്

ദുര്‍ഗാഷ്ടമിയുടെ ഏറ്റവും പ്രധാനപ്പെട്ട ചടങ്ങ് പൂജവയ്പ്പാണ്. സരസ്വതി ദേവിയെ സങ്കല്‍പ്പിച്ച്, വീട്ടിലെ പൂജാമുറിയിലോ ക്ഷേത്രങ്ങളിലോ, ഗ്രന്ഥങ്ങളും (വിശേഷിച്ച് ഓല ഗ്രന്ഥങ്ങളും എഴുത്താണി ഉള്‍പ്പെടെയുള്ളവയും) തൊഴിലുമായി ബന്ധപ്പെട്ട ഉപകരണങ്ങളും പൂജക്കായി സമര്‍പ്പിക്കുന്നു.

ഈ സമയം മുതല്‍ വിജയദശമി ദിവസം പൂജയെടുക്കുന്ന സമയം വരെ പഠനമോ, തൊഴില്‍പരമായ ജോലികളോ ചെയ്യാന്‍ പാടില്ല. അറിവിനും ഉപജീവനമാര്‍ഗത്തിനും ഉപയോഗിക്കുന്ന വസ്തുക്കളെ ദേവിയായി കണ്ട് ആരാധിക്കുകയും അവയ്ക്ക് വിശ്രമം നല്‍കുകയും ചെയ്യുക എന്നതാണ് ഈ ആചാരത്തിന്റെ പൊരുള്‍.

വ്രതശുദ്ധിയോടും ഭക്തിയോടും കൂടി ദുര്‍ഗാഷ്ടമി ദിനം ആചരിക്കുന്നത് ജീവിതത്തില്‍ ഐശ്വര്യവും വിജ്ഞാനവും നല്‍കുമെന്നാണ് വിശ്വാസം. ഈ മൂന്ന് ദിവസങ്ങളിലെ (അഷ്ടമി, നവമി, വിജയദശമി) പൂജകള്‍ വിഘ്‌നങ്ങള്‍ നീക്കി വിദ്യാപരമായ കാര്യങ്ങളില്‍ വിജയം നേടാന്‍ സഹായിക്കുമെന്നും ഭക്തര്‍ വിശ്വസിക്കുന്നു.