ലോകത്തിലെ ഏറ്റവും ഉയരം കൂടിയ ഗണേശ പ്രതിമ ഇവിടെ

ഇന്ത്യ, എണ്ണമറ്റ ക്ഷേത്രങ്ങള്‍ക്ക് പേരുകേട്ട രാജ്യമാണ്. എന്നാല്‍ ലോകത്തിലെ ഏറ്റവും ഉയരം കൂടിയ ഗണേശ പ്രതിമ ഇന്ത്യയിലല്ല, എന്ന് നിങ്ങള്‍ക്ക് അറിയാമോ? തായ്ലന്‍ഡിലെ ചാചോങ്സാവോ പ്രവിശ്യയിലാണ്  ഈ വിസ്മയകരമായ വെങ്കല പ്രതിമ സ്ഥാപിച്ചിരിക്കുന്നത്.

ക്ലോങ് ഖുയാന്‍ ഗണേഷ് ഇന്റര്‍നാഷണല്‍ പാര്‍ക്കിലെ 39 മീറ്റര്‍ ഉയരമുള്ള ഗണേശ പ്രതിമയുടെ നിര്‍മാണ് 2012 ലാണ് പൂര്‍ത്തിയായത്. 854 വെങ്കല കഷ്ണങ്ങള്‍ കൊണ്ട് നിര്‍മ്മിച്ചതും 40,000 ചതുരശ്ര മീറ്റര്‍ വിസ്തൃതിയുള്ളതുമായ ഈ പ്രതിമ, ബാങ് പക്കോങ് നദിക്ക് മുകളില്‍ ഗാംഭീര്യത്തോടെ ഉയര്‍ന്നുനില്‍ക്കുന്നു. ഇന്ന് തായ്‌ലാന്‍ഡില്‍ എത്തുന്ന വിനോദസഞ്ചാരികളുടെ പ്രിയപ്പെട്ട കാഴ്ചയാണ് ഇത്.

തായ്ലന്‍ഡിന്റെ സമൃദ്ധിയുടെ പ്രതീകമായാണ് ഈ ഗണപതി രൂപം രൂപകല്‍പ്പന ചെയ്തിരിക്കുന്നതെന്ന് പ്രതിമയുടെ കലാകാരനായ പിതക് ചാലെംലാവോ പറയുന്നു. വളര്‍ച്ചയെയും ഐശ്വര്യത്തെയും പ്രതിനിധീകരിക്കുന്ന കരിമ്പ്, ചക്ക, വാഴപ്പഴം, മാമ്പഴം എന്നിവ പിടിച്ചിരിക്കുന്ന നാല് കൈകളാണ് ദേവന്. രാജ്യത്തിന്റെ പുരോഗതിയുടെ അടയാളമായി താമര കിരീടവും പ്രതിമയില്‍ ഉള്‍പ്പെടുത്തിയിട്ടുണ്ട്.

തായ്ലന്‍ഡിലെ ആത്മീയ-സാംസ്‌കാരിക കേന്ദ്രമായി സ്ഥാപിതമായ ക്ലോങ് ഖുയാന്‍ ഗണേഷ് ഇന്റര്‍നാഷണല്‍ പാര്‍ക്കിന്റെ കേന്ദ്രബിന്ദുവാണ് ഈ പ്രതിമ. രാവിലെ 8 മുതല്‍ വൈകുന്നേരം 5 വരെയാണ് സന്ദര്‍ശന സമയം. 100 ടിഎച്ച്ബി (ഏകദേശം 240 രൂപ) ആണ് ടിക്കറ്റ് വില. തായ് പൗരന്മാര്‍ക്ക് പ്രവേശനം സൗജന്യമാണ്.

2012 ല്‍ ആയിരുന്നു ക്ലോങ് ഖുയാന്‍ ഗണേഷ് ഇന്റര്‍നാഷണല്‍ പാര്‍ക്കില്‍ ഈ ലോകത്തിലെ തന്നെ ഏറ്റവും വലിയ ഗണേശ വിഗ്രഹം സ്ഥാപിക്കപ്പെട്ടത്. നാല് കൈകളിലായി ചക്ക, കരിമ്പ്, വാഴപ്പഴം, മാമ്പഴം എന്നിവ പിടിച്ചുകൊണ്ട് നില്‍ക്കുന്ന രൂപത്തിലാണ് ഈ ഗണേശ വിഗ്രഹം ഉള്ളത്. നാലുവര്‍ഷം എടുത്താണ് നിര്‍മ്മാണം പൂര്‍ത്തിയാക്കിയത്. ദിവസം തോറും നിരവധി ടൂറിസ്റ്റുകളും ഈ ഗണേശ വിഗ്രഹം കാണാനായി ഇവിടെ എത്താറുണ്ട്.