ഇന്ത്യയുടെ ഉല്‍പന്ന കയറ്റുമതിയില്‍ ഇടിവ്

മുംബൈ: ജൂലായിലെ ഇന്ത്യയുടെ ഉല്‍പന്ന കയറ്റുമതിയില്‍ ഇടിവ് രേഖപ്പെടുത്തി. ഇന്ത്യയുടെ ഉത്പന്ന കയറ്റുമതി 1.2 ശതമാനം ഇടിഞ്ഞ്
3398 കോടി ഡോളറിലെത്തി. അമേരിക്കയിലും യൂറോപ്പിലും മാന്ദ്യം ശക്തമായതോടെയാണ് ഇന്ത്യയുടെ ഉത്പന്ന കയറ്റുമതിയിലും ഇടിവ് രേഖപ്പെടുത്തിയത്. മുന്‍വര്‍ഷം ഇതേകാലയളവില്‍ 3,439 കോടി ഡോളറായിരുന്നു.

അതേസമയം ഇറക്കുമതി കഴിഞ്ഞ വര്‍ഷം ജൂലായിലെ 5349 കോടി ഡോളറില്‍ നിന്ന് 7.45 ശതമാനം ഉയര്‍ന്ന് 5,748 കോടി ഡോളറിലെത്തി. കയറ്റുമതിയും ഇറക്കുമതിയും തമ്മിലുള്ള വിടവായ വ്യാപാര കമ്മി 2,350 കോടി ഡോളറായി ഉയര്‍ന്നു. ജൂണില്‍ കയറ്റുമതി 2.56 ശതമാനം വര്‍ദ്ധനയോടെ 3,520 കോടി ഡോളറിലെത്തിയിരുന്നു. നടപ്പു സാമ്പത്തിക വര്‍ഷത്തെ ആദ്യ നാല് മാസത്തില്‍ ഇന്ത്യയുടെ മൊത്തം ഉത്പന്ന കയറ്റുമതി 4.15 ശതമാനം വര്‍ദ്ധനയോടെ 14,412 കോടി ഡോളറിലെത്തി. ഇക്കാലയളവില്‍ ഇറക്കുമതി 7.57 ശതമാനം ഉയര്‍ന്ന് 22,970 കോടി ഡോളറായി.