ഫ്രീഡം സെയില്‍ ഓഫര്‍ പ്രഖ്യാപിച്ച് എയര്‍ ഇന്ത്യ എക്‌സ്പ്രസ്

മുംബൈ: ടാറ്റ ഗ്രൂപ്പിന്റെ ഉടമസ്ഥതയിലുള്ള എയര്‍ ഇന്ത്യയുടെ അനുബന്ധ സ്ഥാപനമായ എയര്‍ ഇന്ത്യ എക്സ്പ്രസ് 'ഫ്രീഡം സെയില്‍'ഓഫര്‍ ആരംഭിച്ചു. ഇതോടെ 1,947 രൂപ മുതല്‍ ടിക്കറ്റുകള്‍ ലഭ്യമാകും. സ്വാതന്ത്ര്യ ദിനത്തോടനുബന്ധിച്ചാണ്് എയര്‍ ഇന്ത്യ എക്സ്പ്രസ് പുതിയ ഓഫര്‍ പ്രഖ്യാപിച്ചിരിക്കുന്നത്.  

എയര്‍ലൈനിന്റെ വെബ്സൈറ്റായ airindiaexpress.com വഴി ബുക്ക് ചെയ്യുന്ന ടിക്കറ്റുകള്‍ മാത്രമായിരിക്കും കുറഞ്ഞ നിരക്കില്‍ ലഭിക്കുക. ആഭ്യന്തര, അന്തര്‍ദേശീയ യാത്രകള്‍ക്ക് ബുക്ക് ചെയ്യുന്നവര്‍ക്ക് 1,947 രൂപ മുതല്‍ ടിക്കറ്റുകള്‍ ലഭിക്കും. ഓഗസ്റ്റ് 1 മുതല്‍ 5 വരെ വരെ ബുക്ക് ചെയ്യാനുള്ള അവസരം ലഭിക്കും. സെപ്റ്റംബര്‍ 30 വരെയുള്ള യാത്രകള്‍ക്കായുള്ള ടിക്കറ്റുകള്‍ ബുക്ക് ചെയ്യാവുന്നതാണ്. 

ഇതുകൂടാതെ, എയര്‍ഇന്ത്യ എക്‌സ്പ്രസ്. കോം വഴി ബുക്ക് ചെയ്യുന്ന ഉപഭോക്താക്കള്‍ക്ക് പ്രത്യേക കിഴിവുകളോടെ സീറോ ചെക്ക്-ഇന്‍ ബാഗേജ് എക്‌സ്പ്രസ് ലൈറ്റ് നിരക്കുകള്‍ പോലുള്ള പ്രത്യേക ആനുകൂല്യങ്ങള്‍ ആസ്വദിക്കാനാകും. ആഭ്യന്തര വിമാനങ്ങളില്‍ 15 കിലോയ്ക്ക് 1000 രൂപയും അന്താരാഷ്ട്ര വിമാനങ്ങളില്‍ 20 കിലോയ്ക്ക് 1300 രൂപയും ആരംഭിക്കുന്ന ചെക്ക്-ഇന്‍ ബാഗേജിന്, 3 കിലോ അധിക ക്യാബിന്‍ ബാഗേജ് മുന്‍കൂട്ടി ബുക്ക് ചെയ്യാനുള്ള ഓപ്ഷനും നിരക്കില്‍ ഉള്‍പ്പെടുന്നു.

ദില്ലി-ജയ്പൂര്‍, ബെംഗളൂരു-ഗോവ, ദില്ലി-ഗ്വാളിയോര്‍ എന്നിവയുള്‍പ്പെടെയുള്ള റൂട്ടുകളിലും 15 അന്താരാഷ്ട്ര, 32 ആഭ്യന്തര റൂട്ടുകളിലും ഓഫര്‍ ലഭ്യമാകും.