അതിസമ്പന്ന നിക്ഷേപകരില്‍ നേട്ടം കൊയ്ത് ആശിഷ് കചോലി

ന്യൂഡല്‍ഹി: ഇന്ത്യയിലെ അതിസമ്പന്നരായ ഓഹരി നിക്ഷേപകരില്‍  2024ല്‍ ഏറ്റവുമധികം നേട്ടം കൈവരിച്ചത് ആശിഷ് കചോലി. 2023 ഡിസംബര്‍ 31 പ്രകാരം 1,191 കോടി രൂപയുടെ ഓഹരികളാണ് കചോലിയ കൈവശം വച്ചിരുന്നതെങ്കില്‍ ഈ വര്‍ഷം ഡിസംബര്‍ 19 പ്രകാരം അതിന്റെ മൂല്യം 89% കുതിച്ച് 2,247 കോടി രൂപയായി. 46% നേട്ടവുമായി മുകുല്‍ അഗ്രവാളാണ് രണ്ടാമത്.

നിക്ഷേപമൂല്യം 4,741 കോടി രൂപയില്‍ നിന്ന് 6,909 കോടി രൂപയിലെത്തി. ആകാശ് മനേക് ബന്‍സാലിയുടെ നിക്ഷേപസമ്പത്ത് 5,554 കോടി രൂപയില്‍ നിന്ന് 43% മുന്നേറി 7,933 കോടി രൂപയായി. അനുജ് സേത്ത് 30%, വിജയ് കേഡിയ 20% എന്നിങ്ങനെ നേട്ടമുണ്ടാക്കിയപ്പോള്‍ ആശിഷ് ധവാനും നെമിഷ് ഷായും സ്വന്തമാക്കിയത് 25% വീതം നേട്ടം.

മനീഷ് ജെയിന്‍ 21%, തേജസ് ത്രിവേദി 15% എന്നിങ്ങനെയും നേട്ടം രേഖപ്പെടുത്തി.  മലയാളിയും ലുലു ഗ്രൂപ്പ് ചെയര്‍മാനുമായ എം.എ. യൂസഫലിക്കും മിന്നുന്ന നേട്ടം കഴിഞ്ഞ ഒരുവര്‍ഷക്കാലത്തുണ്ടായി. 2023 ഡിസംബര്‍ 31 പ്രകാരം 1,672 കോടി രൂപയുടെ നിക്ഷേപ സമ്പത്താണ് യൂസഫലിക്കുണ്ടായിരുന്നതെങ്കില്‍ ഈ മാസം 19 പ്രകാരം അത് 28% വര്‍ധിച്ച് 2,135 കോടി രൂപയായി. അതേസമയം, രാധാകിഷന്‍ ദമാനി 19%, ഹേമേന്ദ്ര കോത്താരി 21%, അനില്‍കുമാര്‍ ഗോയല്‍ 10%, ഭവൂക് ത്രിപാഠി 7% എന്നിങ്ങനെ നഷ്ടമാണ് നേരിട്ടത്.