അടിമുടി പരിഷ്‌കരണത്തിന് ചൈന; നേട്ടം മുകേഷ് അംബാനിയുടെ റിലയൻസിന്

വ്യവസായ മേഖലയിലെ അമിത ഉത്പാദനം നിയന്ത്രിക്കാനുള്ള ചൈനയുടെ നയങ്ങൾ റിലയൻസ് ഇൻഡസ്ട്രീസിന് വലിയ നേട്ടമാകുമെന്ന് ആഗോള സാമ്പത്തിക സ്ഥാപനമായ മോർഗൻ സ്റ്റാൻലി. വിവിധ മേഖലകളിൽ, പ്രത്യേകിച്ചും ഊർജ, സൗരോർജ വിതരണ ശൃംഖലകളിൽ, ചൈന നടപ്പാക്കുന്ന 'ആന്റി-ഇൻവല്യൂഷൻ' നയം മുകേഷ് അംബാനിയുടെ റിലയൻസിന് ഗുണകരമാകുമെന്നാണ് മോർഗൻ സ്റ്റാൻലിയുടെ വിലയിരുത്തൽ .

 ചൈനയിലെ സാമ്പത്തിക മേഖലയിൽ 'ഇൻവലൂഷൻ' എന്നൊരു വാക്ക് ഉപയോഗിക്കാറുണ്ട്. ലാഭകരമല്ലാത്ത, കടുത്ത മത്സരത്തെയാണ് ഇത് സൂചിപ്പിക്കുന്നത്.

 ഈ സാഹചര്യം മാറ്റിയെടുക്കാൻ ചൈന നടത്തുന്ന ശ്രമങ്ങളെയാണ് 'ആന്റി-ഇൻവലൂഷൻ' എന്ന് വിശേഷിപ്പിക്കുന്നത്.

മോർഗൻ സ്റ്റാൻലിയുടെ റിപ്പോർട്ട് പ്രകാരം, ചൈനയിലെ ഈ നയപരമായ മാറ്റങ്ങളുടെ ഏറ്റവും വലിയ ഗുണഭോക്താക്കളിൽ ഒരാളാണ് റിലയൻസ്.

 പ്രത്യേകിച്ചും ഊർജ്ജ-സോളാർ മേഖലകളിൽ ഇത് വലിയ നേട്ടങ്ങളുണ്ടാക്കും. ചൈന അമിത ഉത്പാദനം നിയന്ത്രിക്കുന്നതിലൂടെ, പോളീസിലിക്കൺ പോലുള്ള അസംസ്‌കൃത വസ്തുക്കളുടെ വില കുറയും. ഇത് ഇന്ത്യയിൽ സോളാർ ഉത്പാദനത്തിന് ആവശ്യമായ എല്ലാ ഘടകങ്ങളും ഒരുകുടക്കീഴിൽ ഒരുക്കുന്ന റിലയൻസിനെ പോലുള്ള കമ്പനികൾക്ക് വലിയ സഹായകമാകും.

 ഈ മാറ്റങ്ങൾ കാരണം 2030 ആകുമ്പോഴേക്കും റിലയൻസിന്റെ ഊർജ്ജ ചെലവ് 40% വരെ കുറയാൻ സാധ്യതയുണ്ടെന്ന് മോർഗൻ സ്റ്റാൻലി ചൂണ്ടിക്കാട്ടുന്നു.

റിലയൻസ് തങ്ങളുടെ വാർഷിക പൊതുയോഗത്തിൽ പുനരുപയോഗ ഊർജ്ജ മേഖലയിൽ വലിയ പദ്ധതികൾ പ്രഖ്യാപിച്ചിരുന്നു.

 ലോകത്തിലെ ഏറ്റവും വലിയ പുനരുപയോഗ ഊർജ്ജ ശൃംഖല നിർമ്മിക്കാനാണ് റിലയൻസിന്റെ ലക്ഷ്യം. അതേസമയം, പരമ്പരാഗത ഊർജ്ജ മേഖലയായ എണ്ണ-രാസവസ്തു ബിസിനസ്സിലും റിലയൻസ് ശ്രദ്ധ കേന്ദ്രീകരിക്കുന്നുണ്ട്.

ചൈനയിലെ നയങ്ങൾ കാരണം പെട്രോ-രാസവസ്തു വ്യവസായം അതിന്റെ മോശം അവസ്ഥ മറികടന്നു എന്നാണ് മോർഗൻ സ്റ്റാൻലി പറയുന്നത്.

 കൂടാതെ, സോളാർ മേഖലയിലെ വിലനിലവാരവും സ്ഥിരത കൈവരിക്കുമെന്നും ഇത് റിലയൻസിന് വലിയ തോതിൽ സഹായകമാവുമെന്നും അവർ ചൂണ്ടിക്കാട്ടുന്നു.

 ഈ മാറ്റങ്ങൾ കാരണം റിലയൻസിന്റെ സാമ്പത്തിക നേട്ടങ്ങളിൽ 17 ശതമാനം വർധനവുണ്ടാകുമെന്നും ഓഹരി വിലകൾക്ക് വലിയ സാധ്യതയുണ്ടെന്നും മോർഗൻ സ്റ്റാൻലി പ്രവചിക്കുന്നു.