മുഹൂര്‍ത്ത വ്യാപാരത്തില്‍ തിളങ്ങി ഇന്ത്യന്‍ ഓഹരി വിപണി

മുംബൈ: മൂഹൂര്‍ത്ത വ്യാപാരത്തില്‍ ഇന്ത്യന്‍ ഓഹരി സൂചികകള്‍ ഉയര്‍ന്നു. എന്‍എസ്ഇയും ബിഎസ്ഇയും നേട്ടത്തിലാണ്. ഉച്ചയ്ക്ക് 1:45 മുതല്‍ 2:45 വരെയാണ് മുഹൂര്‍ത്ത വ്യാപാരം നടന്നത്. സംവത് 2082 ന്റെ ഭാഗമായി ഇന്ന് ഒരു മണിക്കൂര്‍ മാത്രമാണ് വിപണി തുറന്നത്. 

സെന്‍സെക്‌സ് 267.08 പോയിന്റ് അഥവാ 0.32 ശതമാനം ഉയര്‍ന്ന് 84,630.45 ലും നിഫ്റ്റി 80.90 പോയിന്റ് അഥവാ 0.31 ശതമാനം ഉയര്‍ന്ന് 25,924.05 ലും എത്തി. ഏകദേശം 1016 ഓഹരികള്‍ നേട്ടമുണ്ടാക്കി, 284 ഓഹരികള്‍ നഷ്ടത്തിലായി, 85 ഓഹരികള്‍ മാറ്റമില്ലാതെ തുടര്‍ന്നു.

എല്ലാ മേഖല സൂചികകളും നേട്ടത്തിലാണ് വ്യാപാരം നടത്തുന്നത്, ബാങ്കിംഗ്, ഐടി, ഓട്ടോ തുടങ്ങിയ മേഖലകള്‍ നേരിയ നേട്ടങ്ങള്‍ കൈവരിച്ചു, മീഡിയ, പവര്‍, ഹെല്‍ത്ത് കെയര്‍ എന്നിവ ഓരോന്നും 0.5% ഉയര്‍ന്നു. ഇന്‍ഫോസിസ്, ടെക് മഹീന്ദ്ര, ഡോ. റെഡ്ഡീസ് ലാബ്‌സ്, ടാറ്റ മോട്ടോഴ്‌സ്, അദാനി പോര്‍ട്ട്‌സ് എന്നിവയാണ് നിഫ്റ്റിയില്‍ പ്രധാന നേട്ടമുണ്ടാക്കിയവ, ഐസിഐസിഐ ബാങ്ക്, ഏഷ്യന്‍ പെയിന്റ്‌സ് എന്നിവ നഷ്ടത്തിലുമാണ് വ്യാപാരം അവസാനിപ്പിച്ചത്. ബിഎസ്ഇ മിഡ്ക്യാപ് സൂചിക 0.3% ഉയര്‍ന്നു, സ്‌മോള്‍ക്യാപ് സൂചിക 0.8% ഉയര്‍ന്നു. വിദേശ നിക്ഷേപകര്‍ (എഫ്ഐഐ) 790 കോടി രൂപയുടെ ഇന്ത്യന്‍ ഓഹരികള്‍ വാങ്ങി.

ഒരു പുതിയ സാമ്പത്തിക തുടക്കം എന്ന നിലയിലാണ് നിക്ഷേപകര്‍ മൂഹൂര്‍ത്ത വ്യാപാരത്തെ കാണുന്നത്. ഇത് ഭാഗ്യവും സമൃദ്ധിയും കൊണ്ടുവരുമെന്ന് വിശ്വസിക്കുന്നു. നിക്ഷേപകര്‍ ജാഗ്രതയോടെ ശുഭാപ്തിവിശ്വാസത്തോടെയാണ് സംവത് 2082 ലേക്ക് പ്രവേശിക്കുന്നത്.