മുംബൈ: കല്യാൺ ജ്വല്ലേഴ്സിന്റെ വിപണി മൂല്യം 50,000 കോടി രൂപ പിന്നിട്ടു. വെള്ളിയാഴ്ച കമ്പനിയുടെ ഓഹരികൾ വിപണിയിൽ വൻ കുതിപ്പു നടത്തിയതിനെത്തുടർന്നാണ് ഈ നേട്ടം. 51,773 കോടി രൂപയാണ് കമ്പനിയുടെ ഇപ്പോഴത്തെ വിപണി മൂല്യം. വ്യാപാരത്തിനിടെ 546 രൂപ വരെ എത്തിയ കല്യാൺ ഓഹരി 502.35 രൂപയിലാണ് വ്യാപാരം അവസാനിപ്പിക്കുന്നത്. ഇത് റെക്കോർഡ് നിലവാരമാണ്. കഴിഞ്ഞ 13 മാസം കൊണ്ട് കല്യാൺ ഓഹരികൾ നിക്ഷേപകർക്ക് 385% നേട്ടമാണു നൽകിയത്. ഒരു വർഷം മുൻപ് 139.65 രൂപയായിരുന്നു ഓഹരിയുടെ വില.
വെള്ളിയാഴ്ച 481 രൂപയ്ക്ക് വ്യാപാരം ആരംഭിച്ച ഓഹരികളാണ് 546 രൂപയിലേക്ക് അതിവേഗം കുതിച്ചത്. തുടർന്ന് ചെറിയതോതിലുള്ള ലാഭമെടുപ്പ് നടന്നതാണ് വ്യാപാരാവസാനത്തിൽ വില 502 രൂപയിലേക്കു കുറയാൻ ഇടയാക്കിയത്.