ഇന്ത്യയിൽ ആദ്യമായി ലോകത്തിലെ ഏറ്റവും ചെറിയ ഡ്യുവൽ ചേമ്പർ ലീഡ്‌ലെസ്സ് പേസ്മേക്കർ ചികിത്സയുമായി കോഴിക്കോട് മെട്രോമെഡ്

കോഴിക്കോട്: ഹൃദയമിടിപ്പിലെ താളപ്പിഴവുകൾക്ക് വിപ്ലവകരമായ പരിഹാരവുമായി കോഴിക്കോട് മെട്രോമെഡ് ഇന്റർനാഷണൽ കാർഡിയാക് സെന്റർ. സർജറിയോ വലിയ മുറിവുകളോ ഇല്ലാതെ ഹൃദയമിടിപ്പ് നിയന്ത്രിക്കുന്ന, ലോകത്തിലെ ഏറ്റവും ചെറിയ ഡ്യുവൽ ചേമ്പർ ലീഡ്‌ലെസ്സ് പേസ്‌മേക്കർ (AVEIR DR) ചികിത്സാ സംവിധാനം ഇന്ത്യയിൽ ആദ്യമായി മെട്രോമെഡ് വിജയകരമായി നടപ്പിലാക്കി.

​മെട്രോമെഡിലെ സീനിയർ കാർഡിയോളജിസ്റ്റ് ആൻഡ് ഇലക്ട്രോ ഫിസിയോളജിസ്റ്റ് ഡോ. അരുൺ ഗോപിയുടെ നേതൃത്വത്തിലുള്ള വിദഗ്ധ സംഘമാണ് അതിനൂതനമായ ഈ ചികിത്സ പൂർത്തിയാക്കിയത്. കോഴിക്കോട് സ്വദേശിയായ 70 വയസ്സുകാരനിലാണ് ഈ സർജറി വിജയകരമായി നടത്തിയത്.

​എന്താണ് AVEIR DR പേസ്മേക്കർ?

​ഹൃദയമിടിപ്പ് കുറയുമ്പോൾ അതിനെ നിയന്ത്രണത്തിലാക്കാൻ ഉപയോഗിക്കുന്ന ഏറ്റവും പുതിയ സാങ്കേതികവിദ്യയാണ് ലീഡ്‌ലെസ്സ് ക്യാപ്സൂൾ പേസ്‌മേക്കർ. ഈ വിഭാഗത്തിലെ ഏറ്റവും പുതിയ പതിപ്പാണ് AVEIR DR.

​ചികിത്സാ രീതിയിലെ വിപ്ലവം:

​മുറിവുകളില്ലാത്ത ചികിത്സ: പഴയ പേസ്‌മേക്കർ സംവിധാനത്തിൽ നെഞ്ചിൽ മുറിവുണ്ടാക്കി ഉപകരണങ്ങൾ സ്ഥാപിക്കുകയും അവിടെ നിന്ന് ഹൃദയത്തിലേക്ക് വയറുകൾ കടത്തിവിടുകയുമായിരുന്നു പതിവ്. ഇത് ഒഴിവാക്കാൻ സിംഗിൾ ചേമ്പർ പേസ്‌മേക്കറുകൾക്ക് കഴിഞ്ഞെങ്കിലും ഹൃദയത്തിന്റെ രണ്ട് അറകളിലും ഒരുമിച്ച് പ്രവർത്തിക്കാനുള്ള ശേഷി അതിനുണ്ടായിരുന്നില്ല.

​വയർലെസ്സ് പ്രവർത്തനം: പുതിയ AVEIR DR സംവിധാനം സർജറിയോ മുറിവുകളോ ഇല്ലാതെ ഹൃദയത്തിന്റെ രണ്ട് അറകളിലും പേസ്‌മേക്കർ ഘടിപ്പിക്കാൻ സഹായിക്കുന്നു. ഈ രണ്ട് ക്യാപ്സ്യൂളുകൾ വയർലെസ്സ് കമ്മ്യൂണിക്കേഷൻ വഴി പരസ്പരം പ്രവർത്തിക്കുകയും ഹൃദയമിടിപ്പ് സാധാരണ നിലയിൽ നിയന്ത്രിക്കുകയും ചെയ്യുന്നു.

​ഇതോടെ, ഹൃദയത്തിന്റെ രണ്ട് അറകളിലെ പ്രവർത്തനം നിയന്ത്രിക്കേണ്ടവർക്ക് പോലും മുറിവുകളില്ലാത്ത ഈ ആധുനിക ചികിത്സയുടെ ഗുണം പൂർണ്ണമായി ലഭിക്കും.

​ചികിത്സ വിജയകരമായി പൂർത്തിയാക്കിയതിൽ വലിയ ചാരിതാർഥ്യമുണ്ടെന്ന് മെട്രോമെഡ് ഇന്റർനാഷണൽ കാർഡിയാക് സെന്റർ ചെയർമാൻ ഡോ. പി.പി. മുഹമ്മദ് മുസ്തഫ പറഞ്ഞു. ഹൃദയമിടിപ്പിന്റെ താളപ്പിഴവുകൾക്ക് പൂർണ്ണമായും പരിഹാരം നൽകുന്ന ഈ അതിനൂതന ചികിത്സാ രീതി ഇന്ത്യയിൽ ആദ്യമായി കോഴിക്കോട്ട് കൊണ്ടുവരാൻ സാധിച്ചത് ആരോഗ്യമേഖലയ്ക്ക് അഭിമാനകരമായ നേട്ടമാണെന്നും അദ്ദേഹം കൂട്ടിച്ചേർത്തു.