കേരള-കൊങ്കണ്‍ മേഖലയില്‍ കൊല്ലം ഭാഗത്ത് ഡ്രില്ലിങ്, വന്‍ കുതിച്ചുചാട്ടമെന്ന് കേന്ദ്രം

കൊല്ലം: കേരളത്തോട് ചേര്‍ന്നുള്ള ആഴക്കടലില്‍ വന്‍ എണ്ണ/പ്രകൃതിവാതക സമ്പത്തുണ്ടെന്ന് കരുതുന്ന മേഖലയില്‍ ഡ്രില്ലിങ്ങിന് തുടക്കമിട്ട് കേന്ദ്ര പൊതുമേഖലാ സ്ഥാപനമായ ഓയില്‍ ഇന്ത്യ. കേരളത്തിന്റെ തെക്കേ അറ്റംമുതല്‍ മഹാരാഷ്ട്ര വരെ നീളുന്ന കേരള-കൊങ്കണ്‍ ബേസിനില്‍, കൊല്ലത്തോട് ചേര്‍ന്നാണ് പര്യവേക്ഷണം. ഇക്കാര്യം സ്ഥിരീകരിച്ച കേന്ദ്ര പെട്രോളിയം മന്ത്രി ഹര്‍ദീപ് സിങ് പുരി, ഊര്‍ജ സ്വയംപര്യാപ്തതയിലേക്കുള്ള ഇന്ത്യയുടെ ശ്രമങ്ങള്‍ക്ക് ഇതൊരു വന്‍ കുതിച്ചുചാട്ടമാണെന്ന് എക്‌സില്‍ വ്യക്തമാക്കി.

നിലവില്‍ ഉപഭോഗത്തിനുള്ള 85-90% ക്രൂഡ് ഓയിലിനും ഇറക്കുമതിയെ ആശ്രയിക്കുന്ന രാജ്യമാണ് ഇന്ത്യ. ഉപഭോഗത്തിനുള്ള പ്രകൃതിവാതകത്തില്‍ 50 ശതമാനവും ഇറക്കുമതിയാണ്. ആഭ്യന്തര ഉല്‍പാദനം വര്‍ധിപ്പിച്ച് ഇറക്കുമതി ആശ്രയത്വം പരമാവധി കുറയ്ക്കാനുള്ള ശ്രമത്തിലാണ് രാജ്യം. ഇതിന്റെ ഭാഗമായാണ് കേരള-കൊങ്കണ്‍ മേഖലയിലെ പര്യവേക്ഷണം. അടുത്തിടെ, ആന്‍ഡമാന്‍ മേഖലയിലും വന്‍ എണ്ണശേഖരമുണ്ടെന്ന് കരുതുന്ന പ്രദേശത്ത് ഇന്ത്യ പര്യവേക്ഷണ നടപടികള്‍ക്ക് തുടക്കമിട്ടിരുന്നു.

കേരള-കൊങ്കണ്‍ മേഖലയില്‍, കൊല്ലം തീരത്തുനിന്ന് 20 നോട്ടിക്കല്‍ മൈല്‍ അകലെയാണ് ഓയില്‍ ഇന്ത്യയുടെ പര്യവേക്ഷണം. 6,000 മീറ്റര്‍ ആഴത്തിലുള്ള ഡ്രില്ലിങ് (കാറ്റഗറി-3 ബേസിന്‍) ഇന്ത്യയിലെ ഏറ്റവും ആഴമേറിയ എണ്ണക്കിണര്‍ ആയിരിക്കുമെന്ന് ഹര്‍ദീപ് സിങ് പുരി പറഞ്ഞു. എണ്ണഖനന നടപടികളുടെ ഭാഗമായി ഓയില്‍ ഇന്ത്യ അടുത്തിടെ ഫ്രഞ്ച് ഊര്‍ജ കമ്പനിയായ ടോട്ടല്‍ എനര്‍ജീസുമായി സാങ്കേതിക സഹകരണത്തിന് കരാര്‍ ഒപ്പുവച്ചിരുന്നു.

ഇന്ത്യയ്ക്ക് ഏകദേശം 3.5 മില്യന്‍ ചതുരശ്ര കിലോമീറ്റര്‍ ചുറ്റളവില്‍ എണ്ണ സമ്പത്തുണ്ടെന്നാണ് പ്രാഥമിക വിലയിരുത്തല്‍. എന്നാല്‍, ഇതില്‍ 8% വരെ മേഖലയില്‍ മാത്രമേ ഇതുവരെ പര്യവേക്ഷണ നടപടികളുണ്ടായിട്ടുള്ളൂ. അതായത്, ഇന്ത്യയ്ക്ക് മുന്നില്‍ വലിയ സാധ്യതകളാണുള്ളതെന്ന് ഈ രംഗത്തുള്ളവര്‍ പറയുന്നു.