മെഡിട്രീനയിൽ മാവേലി തമ്പുരാൻ്റെ ഓണസമ്മാനം; മാതൃകാപരമായി രക്തദാനം നടത്തി.

കൊല്ലം: അവിട്ടം നാളിൽ കൊല്ലം മെഡിട്രീന ആശുപത്രിയിലേക്ക് ഒരു അപ്രതീക്ഷിത അതിഥി കടന്നുവന്നപ്പോൾ, ആ കാഴ്ച ആശുപത്രിയിലെ ജീവനക്കാർക്കും രോഗികൾക്കും ഒരുപോലെ കൗതുകം നൽകി.

ഗതാഗത ബോധവത്കരണ പരിപാടിയിൽ മാവേലിയായി വേഷമിടേണ്ടി വന്ന കെഎസ്ആർടിസി ഡ്രൈവർ നൗഷാദ്, പതിവുപോലെ തൻ്റെ രക്തദാനം മുടക്കാതിരിക്കാൻ മാവേലിയുടെ വേഷത്തിൽത്തന്നെ മെഡിട്രീന ആശുപത്രിയിലെത്തിയതാണ് അത്ഭുത കാഴ്ചയായി മാറിയത്.

​വർഷങ്ങളായി ഓരോ മൂന്നുമാസം കൂടുമ്പോഴും മുടങ്ങാതെ രക്തദാനം നടത്തുന്ന നൗഷാദ്, ഇത്തവണ 39-ാമത്തെ രക്തദാനമാണ് നടത്തിയത്. രക്തം നൽകുന്നതിനായി മുൻകൂട്ടി അറിയിച്ചിരുന്ന ദിവസം തന്നെ ഒരു ട്രാഫിക് ബോധവത്കരണ പരിപാടിയിൽ മാവേലിയായി വേഷമിടേണ്ടി വന്നു. തൻ്റെ ദൗത്യത്തിൽ നിന്ന് പിന്നോട്ട് പോകാതെ, മാവേലി വേഷത്തിൽത്തന്നെ അദ്ദേഹം മെഡിട്രീനയിൽ എത്തുകയായിരുന്നു.

​ആശുപത്രിയിലേക്ക് മാവേലി കടന്നുവന്നത് ജീവനക്കാർക്കും രോഗികൾക്കും കുട്ടികൾക്കും ഒരുപോലെ കൗതുകമുണ്ടാക്കി. കുട്ടികളോടൊപ്പം സെൽഫിയെടുത്തും ഓണാശംസകൾ നേർന്നും മാവേലി തമ്പുരാൻ അവിടെ കുറെ സമയം ചിലവഴിച്ചു.

​മെഡിട്രീന ഡയറക്ടർ പ്രിൻസ്, മാർക്കറ്റിംഗ് ഹെഡ് രാകേഷ്, മീഡിയ ഹെഡ് റിയാസ്, ഫിനാൻസ് ഓഫീസർ ബിജു എന്നിവരുടെ നേതൃത്വത്തിലാണ് ഈ പരിപാടി സംഘടിപ്പിച്ചത്. പ്രശസ്ത ഹൃദ്രോഗ വിദഗ്ദ്ധൻ ഡോ. പ്രതാപ് കുമാറിൻ്റെ നേതൃത്വത്തിൽ പ്രവർത്തിക്കുന്ന മെഡിട്രീന ഗ്രൂപ്പ്, സമൂഹത്തിന് മാതൃകയാകുന്ന ഇത്തരം പ്രവർത്തനങ്ങളെ എന്നും പ്രോത്സാഹിപ്പിക്കാറുണ്ട്. ജോയിൻ്റ് ആർ.ടി.ഒ ശരത് ചന്ദ്രനും പരിപാടിയിൽ പങ്കെടുത്തു. നൗഷാദിൻ്റെ ഈ പ്രവൃത്തി മറ്റുള്ളവർക്ക് ഒരു പ്രചോദനമാകുമെന്ന് മെഡിട്രീന അധികൃതർ അഭിപ്രായപ്പെട്ടു.