/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/member_avatars/2025/01/24/2025-01-24t111056647z-bijuks.png )
/kalakaumudi/media/media_files/2025/03/18/sNReQ5o81mWmAgaWzCjj.jpg)
അഗര്‍ത്തല: രാജ്യത്തെ ഏറ്റവും മികച്ച ബിസിനസ് കൂട്ടായ്മകളില്‍ ഒന്നാണ് ടാറ്റ ഗ്രൂപ്പ്. നിരവധി കമ്പനികളുമായും, സംസ്ഥാന സര്‍ക്കാരുകളുമായും വിവിധ പദ്ധതികളില്‍ ഒന്നിച്ചു പ്രവര്‍ത്തിക്കുന്ന സ്ഥാപനങ്ങളില്‍ ഒന്നു കൂടിയാണിത്. നിലവില്‍ ത്രിപുര സര്‍ക്കാരുമായി ടാറ്റ ഗ്രൂപ്പ് ഉണ്ടാക്കിയിരിക്കുന്ന ഒരു കരാര്‍ കമ്പനിയുടെ ശേഷിയും, സ്വാധീനവും വ്യക്തമാക്കുന്നതാണ്.
ടാറ്റ ഗ്രൂപ്പിന്റെ അനുബന്ധ സ്ഥാപനമായ ഇന്ത്യന്‍ ഹോട്ടല്‍സ് കമ്പനി ലിമിറ്റഡ് ആണ് ത്രിപുര സര്‍ക്കാരുമായി കരാര്‍ ഒപ്പുവച്ചിരിക്കുന്നത്.
സംസ്ഥാനത്തെ രാജകീയ സ്വത്തായ പുഷ്പബന്ത കൊട്ടാരത്തെ ലോകോത്തര നിലവാരമുള്ള ഒരു പഞ്ചനക്ഷത്ര ഹോട്ടലാക്കി മാറ്റുന്നതിനാണ് കരാര്‍. കഴിഞ്ഞ കുറച്ചു വര്‍ഷങ്ങള്‍ക്കു മുമ്പ് വരെ ഈ കൊട്ടാരം സംസ്ഥാന ഗവര്‍ണറുടെ വസതിയായിരുന്നു. 2018 -ലാണ് രാജ്ഭവന്‍ ന്യൂ ക്യാപിറ്റല്‍ കോംപ്ലക്സിലെ പുതിയ കെട്ടിടത്തിലേയ്ക്ക് മാറ്റിയത്. 100 വര്‍ഷത്തിലേറെ പൈതൃകമുള്ള കൊട്ടാരമാണ് പുതിയ ബിസിനസ് ആശയമായി മാറുന്നത്.
ഹോളിയോട് അനുബന്ധിച്ചായിരുന്നു സംസ്ഥാന സര്‍ക്കാരും, ടാറ്റയും തമ്മിലുള്ള കരാര്‍. നിറങ്ങളുടെ ഉത്സവമായ ഹോളിയുടെ ശുഭകരമായ അവസരത്തില്‍ കരാര്‍ ഒപ്പിട്ടതില്‍ സന്തോഷമുണ്ടെന്നും, ഇത് സംസ്ഥാനത്തെ സംബന്ധിച്ച് ചരിത്ര ദിനമാണെന്നും ത്രിപുര മുഖ്യമന്ത്രി മണിക് സാഹ പറഞ്ഞു. ലോകോത്തര പഞ്ചനക്ഷത്ര ഹോട്ടല്‍ വികസിപ്പിക്കുന്നതിനായി ഐഎച്ച്സിഎല്‍ ഏതെങ്കിലുമൊരു സംസ്ഥാന സര്‍ക്കാരുമായി കരാറിലെത്തുന്നതും ഇതാദ്യമാണ്.
മാണിക്യ രാജവംശത്തിന്റെ ചരിത്രവും, പൈതൃകവും സംരക്ഷിക്കുന്നതിനൊപ്പം, ആഗോളതലത്തില്‍ പ്രചരിപ്പിക്കുകയാണ് പ്രസ്തുത നീക്കം വഴി സര്‍ക്കാര്‍ ലക്ഷ്യമിടുന്നത്. ഇതുവഴി സംസ്ഥാനം സന്ദര്‍ശിക്കുന്ന വിദേശ വിനോദസഞ്ചാരികള്‍ക്ക് രാജവംശത്തിന്റെ ചരിത്രത്തെക്കുറിച്ച് വ്യക്തമായ ധാരണയുണ്ടാകുമെന്ന് സാഹ കൂട്ടിച്ചേര്‍ത്തു.
നിര്‍ദിഷ്ട ഹോട്ടല്‍ താജ് പുഷ്പബന്ത പാലസ് എന്നാകും അറിയപ്പെടുക. അടുത്ത മൂന്ന് വര്‍ഷത്തിനുള്ളില്‍ പദ്ധതി പൂര്‍ത്തീകരിക്കാനണ് കരാര്‍. 250 കോടി രൂപയാണ് ചെലവ് പ്രതീക്ഷിക്കുന്നത്. ആകെ 104 മുറികള്‍ ഈ പ്രോജക്ടില്‍ ഉണ്ടാകും. ഇതില്‍ നാലെണ്ണം രാജാക്കന്മാരുടെ ജീവിതശൈലി കണക്കിലെടുത്ത് വികസിപ്പിക്കുന്നതാകും.
1917 ല്‍ മഹാരാജ ബീരേന്ദ്ര കിഷോര്‍ മാണിക്യ ബഹാദൂറാണ് ഈ കൊട്ടാരം നിര്‍മ്മിച്ചത്.നോബല്‍ സമ്മാന ജേതാവായ രവീന്ദ്രനാഥ ടാഗോര്‍ പുഷ്പബന്ത പാലസില്‍ താമസിച്ചിട്ടുണ്ട്. കൂടാതെ അദ്ദേഹം 1941 മെയ് മാസത്തില്‍ തന്റെ ജന്മദിനം ഇവിടെ ആഘോഷിക്കുകയും ചെയ്തിട്ടുണ്ടെന്നു ചരിത്ര രേഖകള്‍ വ്യക്തമാക്കുന്നു.