ഫോബ്സ് പട്ടികയിൽ ഇടം നേടി ഏഴ് മലയാളികൾ; ഒന്നാമതായി മുത്തൂറ്റ്

ന്യൂഡൽഹി: 2024-ലെ രാജ്യത്തെ അതിസമ്പന്നരുടെ ഫോബ്‌സ് പട്ടികയിൽ ഇത്തവണ 7 മലയാളികളും ഇടംനേടി. നൂറുപേരുടെ പട്ടികയാണ് ഫോബ്‌സ് പ്രസിദ്ധീകരിച്ചത്.

ജോർജ് ജേക്കബ്, ജോർജ് തോമസ്, സാറാ ജോർജ്, ജോർജ് അലക്‌സാണ്ടർ എന്നിവരുടെ ആസ്തികൾ ചേർത്ത് 7.8 ബില്യൺ ഡോളറോടെ (65,520 കോടി രൂപ) ധനികരായ മലയാളി കുടുംബമായി മുത്തൂറ്റ് പട്ടികയിൽ ഒന്നാമതായി ഇടംപിടിച്ചു. 37-ാം സ്ഥാനത്താണ് മുത്തൂറ്റ് ഫാമിലി. ലുലു ഗ്രൂപ്പ് ചെയർമാൻ എം.എ. യൂസഫലിയാണ് മലയാളിയായ വ്യക്തിഗത സമ്പന്നരിൽ മുന്നിൽ. 7.4 ബില്യൺ ഡോളർ ആസ്തിയോടെ (62,160 കോടി രൂപ) രാജ്യത്തെ 39-ാം സ്ഥാനം യൂസഫലി സ്വന്തമാക്കി.

കല്യാൺ ജൂവലേഴ്സ് മാനേജിങ്‌ ഡയറക്ടർ ടി.എസ്. കല്യാണരാമൻ അറുപതാം സ്ഥാനത്തുണ്ട്. 5.38 ബില്യൺ ഡോളറാണ് (45,192 കോടി രൂപ) ടി.എസ്. കല്യാണരാമന്റെ ആസ്തി. 4.35 ബില്യൺ ഡോളർ ആസ്തിയോടെ (36,540 കോടി രൂപ) ഇൻഫോസിസ് സഹസ്ഥാപകൻ ക്രിസ് ഗോപാലകൃഷ്ണൻ 73-ാം സ്ഥാനത്തുണ്ട്. 3.5 ബില്യൺ ഡോളർ ആസ്തിയോടെ (29,400 കോടി രൂപ) ജെംസ് ഗ്രൂപ്പ് ചെയർമാൻ സണ്ണി വർക്കി 95-ാം സ്ഥാനത്തും 3.4 ബില്യൺ ആസ്തിയോടെ (28,560 കോടി രൂപ) ആർപി ഗ്രൂപ്പ് ചെയർമാൻ രവി പിള്ള 97-ാം സ്ഥാനത്തും 3.37 ബില്യൺ ആസ്തിയോടെ (28,308 കോടി രൂപ) ജോയ് ആലുക്കാസ് 98-ാം സ്ഥാനത്തും ഇടം നേടി.

മുകേഷ് അംബാനിയാണ് രാജ്യത്തെ ഏറ്റവും ധനികൻ. 119.5 ബില്യൺ ഡോളർ ആസ്തിയാണ് മുകേഷ് അംബാനിക്കുള്ളത്.