/kalakaumudi/media/media_files/2025/07/28/ytcs-2025-07-28-15-49-09.jpg)
മുംബൈ: എ ഐ സാങ്കേതിക വിദ്യയുടെ വരവോടുകൂടി മനുഷ്യര്ക്ക് കാര്യങ്ങള് കൂടുതല് എളുപ്പമായെങ്കങ്കിലും യുവതലമുറയുടെ ജീവിതത്തെത്തന്നെ ബാധിക്കുന്നതരത്തിലേക്ക് മാറാനൊരുങ്ങുകയാണ്. മനുഷ്യന് ചെയ്യുന്ന കാര്യങ്ങള് സാങ്കേതിക വിദ്യയുടെ സഹായത്തോടെ ചെയ്യാനായാല് തൊഴിലാളികളെ കുറക്കുന്നതിലേക്ക് കമ്പനികള് പോലും പോയെന്ന് വരാം.
അത്തരമൊരു വിലയിരുത്തല് ശരിവയ്ക്കുന്ന വാര്ത്തകളാണ് ഇപ്പോള് പുറത്തുവരുന്നത്. രാജ്യത്തെ വമ്പന് ഐടി കമ്പനിയായ ടാറ്റ കണ്സള്ട്ടന്സി സര്വീസസ് (ടിസിഎസ്) രണ്ടു ശതമാനം ജീവനക്കാരെ പിരിച്ചു വിടുന്നതായി റിപ്പോര്ട്ട്. 2026 സാമ്പത്തിക വര്ഷത്തിലാണ് ജീവനക്കാരെ പിരിച്ചു വിടാന് തീരുമാനിച്ചിരിക്കുന്നത്. മിഡില്, സീനിയര് മാനേജ്മെന്റ് തലത്തിലുള്ള 12,200 പേര്ക്ക് ജോലി നഷ്ടമാകുമെന്നാണു സൂചന.
ടിസിഎസിന് ഏകദേശം 6,13,000 ജീവനക്കാരാണുള്ളത്. വിവിധ പ്രവര്ത്തനങ്ങള്ക്ക് ആര്ട്ടിഫിഷ്യല് ഇന്റലിജന്സ് സാങ്കേതിക വിദ്യയെ വിന്യസിക്കുന്നതിനാലാണു പുതിയ നടപടിയെന്ന് സൂചനയുണ്ട്. ആഗോള തലത്തില് ഐടി കമ്പനികള് ജീവനക്കാരെ കുറയ്ക്കുന്ന പ്രവണത നിലവിലുണ്ട്. കമ്പനിയുടെ സേവനങ്ങള് തടസ്സപ്പെടാത്ത രീതിയിലായിരിക്കും തൊഴില് പുനക്രമീകരണം നടപ്പിലാക്കുകയെന്നു ടിസിഎസ് പ്രസ്താവനയില് വ്യക്തമാക്കി. ഐടി രംഗത്ത് ഭാവി സുനിശ്ചിതമാക്കുന്നതിനുള്ള നടപടികള് സ്വീകരിച്ചുവരികയാണെന്നും കമ്പനി അധികൃതര് പറഞ്ഞു.
നിര്മിത ബുദ്ധിയുടെ കടന്നു വരവാണു ജോലി വെട്ടിക്കുറയ്ക്കലിന് ഇടയാക്കിയതെന്ന വാര്ത്തകള് ടിസിഎസ് അധികൃതര് നിഷേധിച്ചു. ഐടി മേഖലയില് പ്രവര്ത്തന രീതികള് മാറിക്കൊണ്ടിരിക്കുകയാണെന്നും ഭാവിക്കായി സജ്ജമാകേണ്ടതുണ്ടെന്നും ടിസിഎസ് സിഇഒ കെ.കൃതിവാസന് ദേശീയമാധ്യമങ്ങളോടു പറഞ്ഞു. നിര്മിതബുദ്ധിപോലുള്ള പുതിയ സാങ്കേതികവിദ്യകളെക്കുറിച്ചും പ്രവര്ത്തന രീതികളിലെ മാറ്റങ്ങളെക്കുറിച്ചും കമ്പനി ചര്ച്ച ചെയ്യുകയാണെന്നും അദ്ദേഹം പറഞ്ഞു. പുതിയ സാങ്കേതിക മേഖലകളില് നിക്ഷേപം നടത്താനും പുതിയ വിപണികളില് പ്രവേശിക്കാനും അടുത്ത തലമുറയിലേക്കായി അടിസ്ഥാന സൗകര്യങ്ങള് വികസിപ്പിക്കാനുമാണ് കമ്പനിയുടെ ശ്രദ്ധയെന്നും അധികൃതര് പറഞ്ഞു.
283 ബില്യന് ഡോളറിന്റെ വരുമാനമാണ് ഇന്ത്യന് ഐടി മേഖല പ്രതിവര്ഷമുണ്ടാക്കുന്നത്. ഇന്ത്യന് ഐടി മേഖലയില് ഏറ്റവും വലിയ തൊഴില്ദാതാക്കളാണ് ടാറ്റ കണ്സള്ട്ടന്സി സര്വീസസ്.