സ്റ്റീല്‍,അലൂമിനിയം ഇറക്കുമതിക്ക് 25 ശതമാനം തീരുവ ചുമത്താന്‍ ട്രംപ്

ന്യൂയോര്‍ക്ക്: കാനഡ, മെക്‌സിക്കോ എന്നിവിടങ്ങളില്‍ നിന്നുള്ള സ്റ്റീല്‍, അലുമിനിയം ഇറക്കുമതികള്‍ക്ക് 25 ശതമാനം തീരുവ ചുമത്തുമെന്ന് യുഎസ് പ്രസിഡന്റ് ഡോണള്‍ഡ് ട്രംപ്. കൂടാതെ അധിക ഇറക്കുമതി തീരുവകളെക്കുറിച്ചുള്ള പ്രഖ്യാപനവും ഈ ആഴ്ച അവസാനം പ്രതീക്ഷക്കുന്നുണ്ട്.

'അമേരിക്കയിലേക്ക് വരുന്ന ഏതൊരു സ്റ്റീലിനും 25 ശതമാനം തീരുവ ഉണ്ടായിരിക്കും' സൂപ്പര്‍ ബൗളിനായി ഫ്‌ലോറിഡയില്‍ നിന്ന് ന്യൂ ഓര്‍ലിയാന്‍സിലേക്കുള്ള യാത്രാമധ്യേ എയര്‍ഫോഴ്സ് വണ്ണില്‍ ട്രംപ് മാധ്യമപ്രവര്‍ത്തകരോട് പറഞ്ഞു. അലൂമിനിയത്തിനും സമാനമായ വ്യാപാര പിഴകള്‍ ബാധകമാകുമെന്ന് അദ്ദേഹം വ്യക്തമാക്കി.

രണ്ട് ദിവസത്തിനുള്ളില്‍ പരസ്പര താരിഫുകള്‍ അവതരിപ്പിക്കാനുള്ള പദ്ധതികളെക്കുറിച്ചും ട്രംപ് സൂചന നല്‍കി. മറ്റ് രാജ്യങ്ങള്‍ യുഎസ് ഉല്‍പ്പന്നങ്ങള്‍ക്ക് തീരുവ ചുമത്തുമ്പോള്‍ വിദേശ ഉല്‍പ്പന്നങ്ങള്‍ക്ക് തീരുവ ചുമത്തേണ്ടിവരുമെന്നാണ് ഇതിനര്‍ഥം. 'അവര്‍ ഞങ്ങളില്‍ നിന്ന് 130 ശതമാനം ഈടാക്കുകയും നമ്മള്‍ അവരില്‍ നിന്ന് ഒന്നും ഈടാക്കാതിരിക്കുകയും ചെയ്താല്‍, അത് അങ്ങനെ തന്നെ തുടരാന്‍ പോകുന്നില്ല,' ട്രംപ് പറഞ്ഞു.

അതേസമയം, ചൈനയില്‍ നിന്നുള്ള ഇറക്കുമതിക്ക് 10 ശതമാനം തീരുവ ഏര്‍പ്പെടുത്തിക്കൊണ്ട് ഡോണള്‍ഡ് ട്രംപ് ഇതിനകം മുന്നോട്ട് പോയിട്ടുണ്ട്.ടെമു, ഷെയിന്‍ പോലുള്ള ഫാസ്റ്റ്-ഫാഷന്‍ കമ്പനികള്‍ ഇറക്കുമതി ചെയ്യുന്ന ചെറിയ പാക്കേജുകളുടെ താരിഫ് കസ്റ്റംസ് അധികൃതര്‍ നടപ്പിലാക്കുന്നതിനുള്ള ഒരു മാര്‍ഗം കണ്ടെത്തുന്നതുവരെ മാറ്റിവയ്ക്കുമെന്ന് വെള്ളിയാഴ്ച ട്രംപ് വെളിപ്പെടുത്തി. ഈ ചെറിയ കയറ്റുമതികളെ മുമ്പ് താരിഫുകളില്‍ നിന്ന് ഒഴിവാക്കിയിരുന്നു.