ബെംഗളൂരുവില്‍ മലയാളി വിദ്യാര്‍ഥിനിയെ ബലാത്സംഗം ചെയ്തു; വീട്ടുടമയായ കോഴിക്കോട് സ്വദേശി അറസ്റ്റില്‍

ബെംഗളൂരു: ബെംഗളൂരുവില്‍ പേയിങ് ഗസ്റ്റായി താമസിക്കുന്ന മലയാളി പെണ്‍കുട്ടിയെ ബലാത്സംഗ ചെയ്ത വീട്ടുടമയായ മലയാളി അറസ്റ്റില്‍. പെണ്‍കുട്ടി നല്‍കിയ പരാതിയുടെ അടിസ്ഥാനത്തിലാണ് കോഴിക്കോട് സ്വദേശിയായ അഷ്‌റഫ് അറസ്റ്റിലായത്. സോളദേവനഹള്ളിയിലെ സ്വകാര്യ കോളജിലെ ബിരുദ വിദ്യാര്‍ഥിനിയാണ് ബലാത്സംഗത്തിന് ഇരയായത്. 

പത്തു ദിവസം മുന്‍പാണ് താന്‍ അഷ്റഫിന്റെ വീട്ടില്‍ പേയിങ് ഗസ്റ്റായി താമസം മാറിയതെന്ന് വിദ്യാര്‍ഥിനി പൊലീസില്‍ നല്‍കിയ പരാതിയില്‍ പറയുന്നു. തിങ്കളാഴ്ച രാത്രി അഷ്റഫ് തന്റെ മുറിയില്‍ വന്ന് സഹകരിച്ചാല്‍ മാത്രമേ ഭക്ഷണവും താമസവും നല്‍കൂ എന്ന് പറഞ്ഞു. ഇത് എതിര്‍ത്തപ്പോള്‍ അഷ്റഫ് തന്നെ നിര്‍ബന്ധിച്ച് കാറില്‍ കയറ്റുകയും മറ്റൊരിടത്തേക്ക് കൊണ്ടുപോയി ലൈംഗികമായി പീഡിപ്പിക്കുകയുമായിരുന്നു എന്നാണ് പെണ്‍കുട്ടി പറയുന്നത്. 

തന്റെ ലൊക്കേഷന്‍ ഒരു സുഹൃത്തിന് അയയ്ക്കാന്‍ ശ്രമിച്ചെങ്കിലും അതിനു കഴിഞ്ഞില്ല. അര്‍ധരാത്രിയോടെ ആയിരുന്നു സംഭവം. പിന്നീട്, ഏകദേശം രാത്രി 1.30 നും 2.15 നും ഇടയില്‍, അഷ്റഫ് വീട്ടില്‍ കൊണ്ടാക്കുകയായിരുന്നു.