അഹമ്മദാബാദില്‍ 3 കുട്ടികള്‍ ഉള്‍പ്പെടെ അഞ്ചംഗ കുടുംബം ഫ്‌ളാറ്റില്‍ മരിച്ചനിലയില്‍

അഹമ്മദാബാദ്: മൂന്നു കുട്ടികളുള്‍പ്പെടെ അഞ്ചംഗ കുടുംബത്തെ ഫ്‌ളാറ്റില്‍ മരിച്ചനിലയില്‍ കണ്ടെത്തി. അഹമ്മദാബാദിനടുത്തുള്ള ബാവ്ലയിലുള്ള ഫ്‌ളാറ്റിനുള്ളിലാണ് വിഷ ദ്രാവകം കഴിച്ച നിലയില്‍ 5 പേരെ മരിച്ച നിലയില്‍ കണ്ടെത്തിയതെന്ന് പൊലീസ് അറിയിച്ചു.

ഓട്ടോ ഡ്രൈവറായ വിപുല്‍ കാഞ്ചി വാഗേല (34), ഭാര്യ സോണല്‍ വാഗേല (26), പതിനൊന്നും അഞ്ചും വയസ്സുള്ള രണ്ട് പെണ്‍മക്കള്‍, 8 വയസ്സുള്ള ഒരു മകന്‍ എന്നിവരാണ് മരിച്ചത്. അഹമ്മദാബാദ് ജില്ലയിലെ ധോല്‍ക്ക സ്വദേശികളാണ് ഇവര്‍. മൃതദേഹങ്ങള്‍ പോസ്റ്റ്മോര്‍ട്ടത്തിനായി ആശുപത്രിയിലേക്കു മാറ്റി. മരണ കാരണം വ്യക്തമല്ലെന്നും അന്വേഷണം നടക്കുന്നുണ്ടെന്നും പൊലീസ് അറിയിച്ചു.